nepal life

रोल्पाय् ९ राउण्ड गोली, वर्षमान पुन लक्षित

नेवा: अनलाइन न्युज | २०७४ कार्तिक २७, सोमबार १०:११:३०

पूर्वअर्थमन्त्री वर्षमान पुनयात लक्षित यानाः रोल्पाय् अज्ञात पुचलं गोली चलेयाःगु दु । चुनावी प्रचार अभियानया झ्वलय् रोल्पाया इरिबाङ गां थ्यंकूम्ह वामगठबन्धनया पाखें रोल्पाया प्रतिनिधिसभाया उम्मेदवार जुयादीम्ह पुनया पुचःयात गोली क्ययेकूगु खः । अज्ञात पुचलं दुईखोली गाउँपालिका–३ य् च्वंगु केवरी खुसिलिक्क ल्वाभः मुइकाः अवरोध यायेधुंकाः चुनावी प्रचारय् लिच्वः लाःगु खः ।

प्रहरीया कथं पुनलिसेंया चुनावी अभियान पुचः बागमारा थ्यनेत्यंगु हे इलय् केवरी खुसि लिक्कया जंगलपाखें आइतवाः सुथय् ११ ता इलय् ९ राउण्ड गोली चलेजूगु जानकारी ब्यूगु दु ।

पुनया सुरक्षार्थ नापंदुपिं प्रहरीं नं ५ राउण्ड गोली चलेयाःगु खः । पुन च्वनावंगु गाडीयात शनिवाः न्हिनय् माड–१ या भिताबाङ गां लिक्कया पेदी खुसिइ एम्बुस तःगु खः । उगु घटनां जोगे जुयाः राङ्सीइ सभा यायेत थ्यंकूम्ह पुनं थ्वसिबें न्ह्यः हे उम्मेदवारया सुरक्षायात खतरा ब्वलंगु खँ धाःगु खः ।

चुनावी प्रचार पुचःयात अवरोध यायेत अज्ञात पुचलं थीथी थासय् ल्वहँ प्रहार व सतक अवरुद्ध तकं याःगु दु । जिल्ला प्रहरी ज्याकुथिया प्रहरी निरीक्षक सुदर्शन पन्थीं गोली प्रहार जूगु थाय् नियन्त्रणय् कयाः अनुसन्धान यानाच्वंगु जानकारी ब्यूगु दु ।

Categorized in दुर्घटना-अपराध