nepal life

रेल दुर्घटना जुया भारतय् २३ म्ह सित, ४० म्ह घाःपाः

नेवा: अनलाइन न्युज | २०७४ भाद्र ४, आइतबार १६:०८:५७

भारतया उत्तर प्रदेशय् जूगु रेल दुर्घटनाय् लानाः कम्ती नं नीस्वम्ह मनूया ज्यान वंगु दुसा मेपिं पीम्ह घाःपाः जूगु दु ।

यात्रु क्वकायेगु झ्वलय् जूगु दुर्घटनाय् घाःपाः जूपिंमध्ये गुलिंसिगु अवस्था तच्वः जूगु प्रहरीं जानकारी ब्यूगु दु । भारतीय रेलमार्गया प्रवक्तां झिंप्यंगू डिब्बाया रेल दुर्घटनाय् लाःगु जानकारी ब्यूगु दु । भारतया केन्द्रीय राजधानी न्हूदिल्लीपाखें थ्यंमथ्यं १०० किलोमिटर तापाःगु मुजफ्फानगर जिल्लाय् दुर्घटना जूगु खः ।

उत्तर प्रदेशया प्रान्तीय प्रहरीं पिथंगु वक्तव्यय् धयातःगु दु, ‘रेलया लिकपाखें पिहां वनेधुंकाः रेल दुर्घटना जूगु खः ।’ वक्तव्यय् नीस्वम्ह मनूत सीगु, पीम्ह घाःपाः जूगु व घाःपाः जूपिन्त थीथी अस्पतालय् वासः यानाच्वंगु नं जानकारी ब्यूगु दु ।

क्षतिग्रस्त रेलया डिब्बा दुने मेपिं सुं सुं मनूत ल्हानाच्वंगु जूगुफूगु आशंका यासें सीपिनिगु ल्याः अप्वइगु अनुमान याःगु दु । घाःपाः जूपिन्त खताउली, मिरुत व मुजफ्फरनगरया अस्पतालय् भर्ना याःगु अधिकारीपिन्सं धाःगु दु ।

प्रहरी व उद्धारकर्ता घाःपाः जूपिन्त उद्धारया नितिं घटनास्थलय् तत्काल खटेयाःगु खः । इमिसं क्षतिग्रस्त रेलया डिब्बात चानाः घाःपाः जूपिन्त पिकाःगु खः । छगः क्रेन नं उद्धारया नितिं छ्यःगु खः । भारतीय टेलिभिजनं दुर्घटनाया विभत्स लू क्यंगु खः । स्थानीय ईकथं शनिवाः बहनी ५ः४५ ता इलय् दुर्घटना जूगु खः । रेलमार्ग मन्त्रालयं आःतक दुर्घटनाया हुनि स्पष्ट मजूनिगु जानकारी ब्यूगु दु । मन्त्रालयं घटनाया विषयस अनुसन्धान यायेत निर्देशन ब्यूगु धाःगु दु ।

भारतीय रेलमन्त्री सुरेश प्रभुं दुःखद् घटनाया अनुसन्धान यानाः घटनाया सत्यतथ्य लुइकेगु व्यवस्था यायेधुनागु जानकारी ब्यूगु दु । वय्कलं घटनाप्रति दुःख प्वंकूसें घटनायात लिक्कं स्वयाच्वनागु खँ नं धाःगु दु ।

भारतय् इलय् ब्यलय् ततःधंगु रेल दुर्घटना जुइगु जुयाच्वंगु दु । न्हापांगु दँ जूगु रेल दुर्घटनाय् लानाः उत्तर प्रदेशय् जक १४५ म्हेसिगु ज्यान वंगु खःसा मेपिं निसःम्हं मल्याक घाःपाः जूगु खः ।

Categorized in अन्तर्राष्ट्रिय