nepal life

रिजु श्रेष्ठया निपू चिनाखँ


छ व जि

छ व जि, झी निम्हसिया सम्झौता
म्हिगः, थौं व कन्हेया अवस्था
छ व जिगु नुगः
छाय् छंगु लुमन्तिं हायेकीगु
छंगु मतिना बाः वःगु
अले छंगु प्रतिक जिं ल्वःमंके मफुगु ।

 

छंगु बिचाः व जि
य् जक वःसां छं थ्यूथें
वाःफय् वःसां छं हे प्रतिकार याःथें
अले बसन्तया मुखुथें मुसु काःगु झीगु मतिना ।

 

म्हिगः झी
प्यखेरं स्वया, पिया तर छन्त जक खनां
म्हां धाःसां छन्त जिगु सर्वस्व बिया
लाः व लुसिथें झीगु मतिनाय् झी ।

 

सर्गय् थः स्वयां छचाखेरं छन्त खनं
हथासं झसंग वना बँय् स्वया

 

थौं झी
ईया किचलय् लात मतया क्वय् किचः जक
मतिनाया हिउपाः नं बुलुहुं सी दयावल ।

सायद बिचाः हे हिउपाः व बिस्वासया जः ।

 

आः गनं झी
थःगु बिचाः  व इच्छाय् अडिग झी
उखे थुखे थःत हे तंकाच्वना ।

 

थः तंका नं छन्त हे लुइकेगु कुतलय्
दुगु अस्तित्व नं मालाच्वन ।

कन्हे छु जुइ झीगु बिचाः, अन्यौल ।

२०७४।५।२५


इनाप नेवाःया

धायेतला धाइगु नेवाः छवाः
जुइबले नेवाःत हे स्ववाः
धाइगु ‘भाषा म्वासा जाति म्वाइ’
नेवाः नं नेवाःयात हे लिफः स्वइ ।

 

हलिमय् बिस्कं म्हसीका नेवाःया
अय्नं धात्थें झीसं म्हसिके मफु झीगु देय्यात ।

भाय् तजिलजि व लिपि स्व
अन्तर्राष्ट्रिय लिखित जुया च्वं
Traditional मखु Modern या पक्षय् झी
नेवाःकरण मखु नेपालीकरण सकलें ।

 

थवं थवय् ल्वापु मखु स्वापु तये धाइ
जुइबले सकस्यां जुइगु ब्यवहार थः कतः ।

नेवाः मुने व दने, झी झी जुइगु नारा
तर, छम्ह नेवाःया नितिं मेम्ह तंगु परम्परा ।

 

जुइमाःगु सकल झी मुक्कं नेवाः
याइपिं पार्टीया सम्झौता व सेवा ।

आश्वासन जक हे जुल, नेवाः झी छप्पं जुइगु
झी झी दया नं सुयात सुं मदुुगु अवस्था ।।

 

बुलुहु ह्याँउनिभाः लुइ, इलं हिउपाः हइगु आशा ।
सचेतना वइ अले सकलें दनिगु भरोसा ।

आः मखुसां छन्हु अवश्य झी नेवाः दनि जुइ
आशा दु अवले तक झी तसकं लिमबाइगु हे खइ ।

 

व्यक्तिगत बिचाः व फुटयात थौं गन खः अन हे त्वःताः

मुनेगु सकलसित जि छम्ह नेवाः मिसाया इनाप ।

२०७४।५।२६

(चिनाखँ च्वमि मय्जु रिजु श्रेष्ठ, बलम्बुइ च्वनादी । वय्कः थक्वातय् च्वंगु हलिं नेवाः इंग्लिस स्कूलया प्रिन्सिपल खः ।)