nepal life

रिजर्भया त्वहः तयाः यात्रुपिंके दोब्बर भाडा बल्खु, कोटेश्वर व कलंकीइ

नेवा: अनलाइन न्युज | २०७४ आश्विन ९, सोमबार ११:३७:४४

मोहनीया लकसय् येँपाखें पिहां वनीगु चीहाकःगु दूरीया सवारीया यात्रुपिन्त अप्वः भाडाया मारय् लाःगु दु । कलंकी व कोटेश्वरं छुटे जुइगु छुं ताःहाकःगु दूरीया बसय् नं यात्रुपिंके दोब्बर भाडा अशुल यायेगु ज्या अप्वयाच्वंगु दु ।

नाकातय्के यात्रुया चाप अप्वया वयेधुंकाः रिजर्भ वनी त्वहः तयाः बस व यात्रुबाहक टाटा सुमों यात्रुपिंके दोब्बर भाडा असुल यायेगु ज्या यानाहःगु दु ।

बल्खुं चले जुइगु टाटा सुमोतसें दोब्बरतक भाडा कयाच्वंसां नं ट्राफिक प्रहरीं छुं कारवाही याःगु मदु । बल्खुं दक्षिणकाली–हेटौंडा जुयाः सर्लाहरीतक चलेजुइगु सुमोतसें दोब्बर भाडा कयाच्वंगु दु ।

बल्खुइ हेटौंडा वनेगु नितिं थ्यंम्ह शिवराम थापां थःम्हं हेटौंडा थ्यंकेत साढे ७ सय तका दां भाडा पुलागु धाःगु दु । हेटौंडा वनेत सुमोया भाडा ४०० सिबें नं म्हो जक क्वःछिनातःगु दु ।

वं धाःगु दु, “सुमो मदु धाइ, रिजर्भ वनेगु खःसा मिलेयानाः यंके तर दोब्बर भाडा पुलेमाः धायेधुंकाः पुला । छु याये छेँय् वने हे माल । न्ह्याक्व धाःसां नं पुले हे माल ।”

बल्खुया छम्ह सुमो व्यवसायी धाःसा हेटौंडापाखें येँय् वयेबलय् खाली वयेमाःगु जूगुलिं थनं अप्वः भाडा मकाःसे यंके मफइगु धाःगु दु । विगतया दँय् नं थथे यानागु धासें वं घाटाय् गाडी चले यायेमफइगु धाःगु दु ।

आः बल्खुं छुटे जुइगु अधिकांश सुमोतसें टिकट ब्यूगु मदु । टिकट ब्यूसां नं रकम काउन्टर पिने दलालपाखें म्हयाः साविकया हे भाडादर च्वयाः बिइगु यानाच्वंगु दु ।

बल्खुइ जक मखु, विपी हाइवे जुयाः चले जुइगु कोटेश्वरया सुमोया काउन्टरं नं अथेहे यानाच्वंगु दु । कलंकीं छुटे जुइगु चितवन चले जुइगु माइक्रों नं अप्वः भाडा असुल यानाच्वंगु गुनासो यात्रुपिन्सं याःगु दु ।

भैरहवाया नितिं छुटे जुइगु वेंगर गाडीं नं दोब्बर सिबें अप्वm भाडा असुल यानाच्वंगु गुनासो वयाच्वंगु दु ।

अग्रीम टिकट कायेत मलाःपिन्सं दोब्बर तक भाडा पुलाः वनेगु यानाच्वंगु धाःगु दु । चीहाकःगु दूरीइ अग्रीम टिकट नं खुले यानाः मतःगुलिं अन हे दकले अप्वः ठगी जुयाच्वंगु सीदूगु दु ।

यातायात व्यवस्था विभागं धाःसा अप्वः भाडा काइगु सवारीयात कडा कारवाही यायेगु धाःगु दु । मोहनीया जःखः काउन्टरपाखें हे अप्वः भाडा काःगु न्याम्ह सिबें अप्वः यातायात समितिया कर्मचारीपिन्त प्रहरीपाखें नियन्त्रण कयाः कारवाही न्ह्यःने यंकूगु विभागया प्रवक्ता टोकराज पाण्डें धाःगु दु ।

ट्राफिक प्रहरीं नं अनुगमन व निगरानी अप्वयेकूगु धाःगु दु । तर, यात्रुपिन्सं धाःसा दलालपाखें अप्वः भाडा पुलाः स्वनिगः त्वःतेत बाध्य जुयाच्वंगु दु ।

Categorized in बजाः