nepal life

राष्ट्रियसभा चुनावया लिच्वः आयोगं राष्ट्रपतियात थौं लःल्हाइगु

नेवा: अनलाइन न्युज | २०७४ माघ २८, आइतबार १०:५९:००

निर्वाचन आयोगं राष्ट्रियसभा निर्वाचनया लिपांगु लिच्वः थौं आइतवाः राष्ट्रपति विद्यादेवी भण्डारीयात लःल्हाइगु जूगु दु ।

मन्त्रिपरिषदया सिफारिसय् राष्ट्रपतिं मनोनयन याइपिं स्वम्ह बाहेक मेमेपिं ५६ म्हेसिगु नां राष्ट्रपतियात लःल्हाइगु जानकारी राष्ट्रपति ज्याकुथिं ब्यूगु खः ।

राष्ट्रियसभाया निर्वाचनलिसें राजनीतिक दलं संघीय संसदय् थ्यंकेमाःगु ३३ प्रतिशत मिसाया कोटा निर्धारण जुइधुंकूलिं आः निर्वाचन लिच्वः लःल्हायेत समस्या मदूगु आयोगं जानकारी ब्यूगु खः ।

स्वम्ह मनोनयनया विषय राष्ट्रपतिया अधिकार दूगुलिं आयोगं उकी दुहाँ मवनेगु प्रवक्ता नवराज ढकालं धयादीगु दु ।

निर्वाचन आयोगं सुथय् ११ ता इलय् शीतल निवासय् राष्ट्रपतियात राष्ट्रियसभा दुजःया निर्वाचनया लिपांगु लिच्वः लःल्हायेगु ज्याझ्वः तयातःगु खः । स्वम्ह मनोनयनया नितिं सरकारं सिफारिस याःसां नं दलतलिसे सहमति मयाःसे एकलौटी सिफारिस याःगुलिं राष्ट्रपति भण्डारी थप सहलह यानाः निर्णय यायेगु पक्षय् खनेदूगु दु ।

निर्वाचन आयोगं लिबाःसा फागुन ५ गतेया दुने प्रतिनिधिसभाया नं लिपांगु निर्वाचन लिच्वः राष्ट्रपतियात लःल्हाइगु जूगु दु । दलतलिसे समानुपातिक पाखे निर्वाचित जूपिनिगु नां सोमवाः सनिलतक लःल्हायेमाःगु जूगु दु । दलतसें लःल्हाःगु नां कानूनी रुपं पाय्छि जूसा सोमवाः बाय् मंगलवाः हे लिपांगु लिच्वः आयोगं लःल्हाइ ।

प्रवक्ता नवराज ढकालं धयादी, “दलतसें न्हापांगु चरणय् हे क्लस्टर मिलेयानाः निर्वाचित जूपिनिगु नां लःल्हाःसा वहे दिं लिच्वः सार्वजनिक यायफइ । मुखसा निन्हुया ई पिइमालेगु जुइ । तर फागनु ५ गते दुने जिमिसं लिपांगु लिच्वः राष्ट्रपति न्ह्यःने लःल्हायेगु जुइ ।”

निर्वाचन आयागं प्रतिनिधिसमभाया निर्वाचित दुजःपिनिगु लिपांगु लिच्वः लःहायेधुंकाः न्हूगु सरकार नीस्वनेगु लँपु चाली ।

Categorized in राष्ट्रिय