nepal life

राष्ट्रपतियात राष्ट्रियसभाया लिच्वः लःल्हात निर्वाचन आयोगं

नेवा: अनलाइन न्युज | २०७४ माघ २८, आइतबार १४:२५:२९

निर्वाचन आयोगं राष्ट्रियसभा निर्वाचनया लिच्वः राष्ट्रपति विद्यादेवी भण्डारीयात लःल्हाःगु दु ।

निर्वाचन आयोगया पदाधिकारीपिन्सं आइतवाः सुथय् ११ ता इलय् राष्ट्रपति भवन शीतल निवासय् थ्यंकाः राष्ट्रपति भण्डारीयात राष्ट्रियसभा निर्वाचनया लिच्वः लःल्हाःगु खः ।

संवैधानिक व्यवस्था कथं राष्ट्रियसभा निर्वाचनया लिच्वः राष्ट्रपतियात लःल्हानागु निर्वाचन आयोगया प्रवक्ता नवराज ढकालं जानकारी बियादीगु दु । वंगु बुधवाः ५६ म्ह दुजःया नितिं जूगु राष्ट्रियसभा निर्वाचनया लिच्वः बिहिवाः सार्वजनिक याःगु खः ।

वहे विवरण आयोगं ७ न्हु दुने राष्ट्रपति न्ह्यःने पेश यायेमाःगु संवैधानिक व्यवस्था दु । संविधान व कानूनया परिधि दुने च्वनाः लिमबाकुसे राष्ट्रियसभा निर्वाचनया लिच्वः राष्ट्रपति न्ह्यःने पश याःगु खँ नं निर्वाचन आयोगया प्रवक्ता ढकालं धयादीगु दु ।

राष्ट्रियसभा निर्वाचनय् एमाले २७ गू सिटय् विजयी जुयाः न्हापांगु दल जुइत ताःलाःगु दु । अथेहे, नेपाली कांग्रेस १३ गू, नेकपा माओवादी केन्द्र १२ गू, राष्ट्रिय जनता पार्टी नेपाल २ गू व संघीय समाजवादी फोरम नेपाल २ गू थासय् विजयी जूगु खः ।

५९ म्ह दुजःया राष्ट्रियसभायात पूर्णता बिइत राष्ट्रपति सरकारया सिफारिसय् स्वम्ह दुजः मनोनित याइगु संवैधानिक व्यवस्था दु ।

निर्वाचन आयोगं लिबाःसा फागुन ५ गतेया दुने प्रतिनिधिसभाया मुकं निर्वाचन लिच्वः नं राष्ट्रपति न्ह्यःने पेश यायेगु तयारी याःगु दु ।

निर्वाचन आयोगं प्रतिनिधिसभा व राष्ट्रियसभाया सकतां निर्वाचन लिच्वः राष्ट्रपति न्ह्यःने पेश यायेखतं न्हूगु सरकार नीस्वनेगु नितिं लँपु खुल्ला जुइ ।

Categorized in राष्ट्रिय