nepal life

रारा गोल्ड कप फुटबल कासाया सिरपाः राशि अप्वयेकल

नेवा: अनलाइन न्युज | २०७४ पौष २५, मंगलबार १५:५६:५६

सहारा क्लब पोखराया ग्वसालय् व हिमश्री फुड्स प्रालिया मू प्रायोजनय् वइगु माघ ९ गतेनिसें २० गतेतक पोखरा रंगशालाय् जुइगु १६ क्वःगु आहा रारा गोल्ड कप फुटबल कासाया सिरपाः राशि अप्वयेकूगु दु ।

थुगु दँ विजेता टोलीं ७ लख व द्वःछि व उपविजेतां ३ लख व न्यय्छद्वः तका दांया लिसें ट्रफी, पदक व दसिपौ कायेखनी । वंगु दँ विजेतां ५ लख व द्वःछि व उपविजेतां २ लख व न्यय्छद्वः तका दां सिरपाः काःगु खः ।

थुगु कासाया विषयस मंगलवाः ग्वसाः ग्वःगु पत्रकार सम्मेलनय् कासाय् १२ गू टोलीया सहभागिता दइगु क्लबया नायः केशव थापां जानकारी बियादीगु दु ।

कासाय् ब्वति काइगु टोलीइ मनाङ मर्स्याङ्दी, एपिएफ क्लब, संकटा क्लब, युनाइटेड सिक्किम फुटबल क्लब भारत, रमपम झापा ११, उत्तर बरिन्धारा क्लब बंगलादेश, त्रिभुवन आर्मी, नेपाल पुलिस, धरान फुटबल क्लब, सुदूरपश्चिम ११, थ्री स्टार व ग्वसाः खलः सहारा क्लब खः ।

Categorized in कासा