nepal life

राज्यकोषं कार्यकर्तापिन्त लखौं तका दां इन, १० करोडया कारोवार

नेवा: अनलाइन न्युज | २०७४ आश्विन १०, मंगलबार १६:५४:५९

सरकारं निर्वाचन आचारसंहिता हाचां गायाः मोहनीया इलय् थः कार्यकर्तापिन्त पोसे यायेत १० करोडसिबें अप्वः तका दां वितरण याःगु दु ।

वंगु असोज २ गतेया मन्त्रिपरिषदया बैठकं प्रधानमन्त्री, गृहमन्त्री व थीथी मन्त्री व कांग्रेस, माओवादी केन्द्रया उच्च नेता लिक्कया ८ सय १९ म्हेसित १० करोडसिबें अप्वः रकम वितरण याःगु प्रधानमन्त्री व मन्त्रिपरिषद ज्याकुथ उच्च स्रोतं जानकारी ब्यूगु दु ।

निर्वाचन आयोगं प्रतिनिधिसभा व प्रदेश सभा निर्वाचनया नितिं आचारसंहिता जारी यायेधुंकूगुलिं सरकारयात छुं नं आर्थिक ग्वाहालि लःमल्हायेत सचेत यानाः वयाच्वंसां नं उकियात बेवास्ता यानाः सरकारं आर्थिक ग्वाहालि लःल्हायेगु निर्णय याःगु खः ।

असोज २ गतेया निर्णय जूसां नं सार्वजनिक जुयाः तःधंगु विरोध जुइगु ग्याःचिकुं सरकारं उकियात गोप्य तःगु खः । राज्यकोषपाखें छन्हुं हे उलिमछि ल्याखय् दां वितरण याःगु थ्व न्हापांगुखुसि खः ।

सरकारं गृहया तप्यंक प्रस्तावय् थीथी व्यक्तियात ५० हजारनिसें ५ लख तका तक दां वितरण याःगु खः । रकम कायेखंपिं ८ सय १९ म्हेसिगु नां धाःसा गोप्य तःगु दु ।

 प्रधानमन्त्री शेरबहादुर देउवा आर्थिक सहायता वितरणया निर्णय यानाः उकिया कन्हय् कुन्हु ३ असोजय् संयुक्त राष्ट्रसंघया १२ क्वःगु महासभाय् ब्वति कायेत अमेरिका प्रस्थान याःगु खः ।

गृहमन्त्री जनार्दन शर्माया प्रस्तावय् मन्त्रिपरिषदं राज्यकोषपाखें १० करोडसिबें अप्वः रकम वितरण यायेगु निर्णय याःगु खः । गृहमन्त्री जनार्दन शर्माया ग्याःचिकुया हुनिं गृह मन्त्रालयया सचिव, सहसचिव लिसेंया अधिकारीपिन्सं उगु प्रस्तावयात गोप्य हे तःगु खः ।

आर्थिक सहायता वितरण सम्बन्धय् विवरण माग याःबलय् गृहसचिव लोकदर्शन रेग्मी सम्पर्कय् वहे चाहे मजूगु खः । मन्त्रालयया लेखा शाखां नं विवरण गोप्य हे तयेत स्वःगु खः । लेखा शाखां नं व सम्बन्धी विवरण वःसां नं बिइ मज्यूगु धाःगु खः ।

लेखाया छम्ह अधिकारी धाःगु दु, “आर्थिक सहायता वितरण जूगु खः तर सुनां सुनां काल धैगु खँ धाये मिले मजू ।”

गृह प्रवक्ता रामकृष्ण सुवेदीं नं आर्थिक सहायता वितरण जूगु सत्य जूगु तर थःपिन्थाय् व सम्बन्धी फाइल मथ्यंगु धयाः लिचिलेगु स्वःगु खः ।

गृह प्रवक्ता सुवेदीं धयादी, “आर्थिक सहायता वितरण सम्बन्धी निर्णय जूगु सत्य खः, विस्तृत विवरण सचिवज्यूया पाखें जिथाय् वये ल्यं दनि ।”

मन्त्रालयं सहजीकरण शाखाया अधिकृत ध्रुवबहादुर शाह विवरण सुचुकेगु ज्याय् व्यस्त खनेदु ।

शाह नं धयादी, “च्वंनिसें हे फुक्क जूगु खः, जिमिसं छुं मस्यु ।” च्वंनिसें निर्णय जुयाः आर्थिक सहायता काःपिनिगु धलः धाःसा सहजीकरण शाखाय् थ्यंगु वय्कलं धाःगु दु ।

शाह नं धयादी, “तर यो विवरण बिइ मिले मजू, थुकियात गोप्य हे तयेगु आदेश वःगु दु ।”

थ्वसिबें न्ह्यः आर्थिक सहायता सम्बन्धी फुक्क प्रस्ताव गृह मन्त्रालयया सहजीकरण शाखापाखें हे न्ह्यःने वनीगु जुयाच्वंगु दु ।

प्रधानमन्त्री व मन्त्रिपरिषद ज्याकुथिया छम्ह अधिकारीया कथं आर्थिक सहायता कायेगुलि सत्तासीन दलया नेता कार्यकर्ता व कथित ठूलाबडा व इमिगु आसेपासे दु ।

गृह स्रोतया कथं उच्च राजनीतिक पहुँच जूगुलिं अथे आर्थिक सहायता कयाः वयाच्वंगु दु । गृहमन्त्रालयया छम्ह अधिकारीं धाःगु दु, “गरिब, विपन्न, अशक्त व पहुँच मदुपिं नागरिक वासः यायेमखनाः सिइत विवश जुयाच्वंगु दु तर इमिसं वासः खर्चवापत सुको नं काये खनाच्वंगु मदु ।”

उम्ह अधिकारीया कथं उज्वःपिं विपन्न नागरिकपिन्त हे आर्थिक सहायता बिइगु कथं गृह मन्त्रालयं दयेकूगु नागरिक राहत क्षतिपूर्ति व आर्थिक सहायता सम्बन्धी कार्यविधिया खिल्ली उडेयासें गृहमन्त्रालय व प्रधानमन्त्री व मन्त्रिपरिषद ज्याकुथिं उच्च, सम्भ्रान्त व राजनीति पहुँचवालापिन्त लखौं तका दां इनाः वयाच्वंगु खः ।

(थौं ने.सं. ११३७ असोज १० गते मंगलवाः अन्नपूर्ण पोष्ट न्हिपती पिदंगु बुखँ)

Categorized in पत्रपत्रिका