nepal life

येँय् एकीकृत वस्ती विकासया नितिं येँ मनपायात इनाप

नेवा: अनलाइन न्युज – निश्चल | २०७४ भाद्र ३, शनिबार १२:४८:१५

मचाराजा मर्हजन

०७२ वैशाख १२ गतेया तःभुखाचं ध्वस्त जूगु येँ देय्या भित्री शहरय् च्वंगु पुलांगु वस्तीत पुनर्निर्माण यायेबलय् आः एकीकृत वस्तीया रुपय् निर्माण यायेमाः धइगु अवधारणा झीसं न्ह्यःने हयागु दु । थ्व ज्यायात छगू  अभियानया रुपय् नं न्ह्याकाच्वनागु दु ।
थुकिया छगू पाइलट प्रोजेक्टया रुपय् येँ मनपा १८ वडास्थित दुम्बो चुकय् ज्या जुयाच्वंगु दु । अन च्वंगु ५४ खा छेँयात आः एकीकृत वस्तीया रुपय् पुनर्निर्माण यायेगु ज्या यानाच्वनागु दु । थुकी येँ मनपालिसे सहकार्य यानाः ज्या न्ह्याकाच्वनागु दुसा मनपां मनपा प्रमुखया हे अध्यक्षताय् ‘एकीकृत वस्ती पुनर्निर्माण उपसमिति’ नं गठन यायेधुंकूगु दु । उगु उपसमितिइ मालपोत, नापी, भवन विभाग, पुनर्निर्माण प्राधिकरण, जिल्ला प्रशासन कार्यालय, स्थानीय विकास मन्त्रालय, भौतिक तथा योजना मन्त्रालय, स्थानीय उपभोक्ता समितिया प्रतिनिधि दुजः कथं च्वनादीगु दु । उपसमिति गठन लिपा फिल्म सर्भेया ज्या क्वचायेधुंकूगु दु ।

  एकीकृत वस्ती विकासया आवश्यकता

– तःभुखाय् लिपा स्थानीय जनता याकःचां छेँ निर्माण याये फइगु अवस्था मदु । उकिं थौंयात ल्वयेक आवासीय जक मखु व्यावसायिक प्रयोजन समेत याये फयेकेत एकीकृत वस्ती विकास याये माःगु आवश्यकता दु ।
–  थुकिं शहरीकरणयात व्यवस्थित याइ ।
–  दैवी प्रकोपपाखें सुरक्षित याइ ।
–  भूमि स्वामित्वया कयाः जुइगु ल्वापुया ज्यंका बी ।
–  भित्री शहरयात व्यवस्थित व्यापारिक केन्द्रया रुपय् विकास याइ ।
–  मौलिक कला संस्कृति व परम्परा ल्यंका तइ ।
–  स्थानीय जनतायात विस्थापित जुइगुपाखें पना बी ।
–  एकीकृत वस्ती दुनेया फुक्क छेँ समान जुइ गुकिं यानाः फय्, निभाः आदि गनं मपंक पर्यावरण बांलाइ ।
–  थःगु छेँपाखें हे आय आर्जन यायेत स्थानीय जनता ताःलाइ ।
–  एकीकृत वस्ती दुने एकीकृत रुपं हे लः, धलः, मत, लँ, खुल्ला थाय् आदि आधुनिक जीवन शैलीयात माःगु सुविधाया व्यवस्था जुइ ।
–  वस्ती दुने परम्परागत बहाः, बही, चीभाः, फल्चा, सतः, दिगि, क्वाःपाःछेँ, आगं, आखा आदि नं सुरक्षित याना तये फइ ।
–  थुकी छेँया मूल्यांकन यानाः उकियात मौद्रिक रुपय् लगानी कथं नालेगु जुइ । प्रत्येक छेँखायात मौद्रिक रुपान्तरण यायेधुंकाः उकियात छेँथुवाःया शेयर कथं मान्यता बिसें उगु शेयरयात छगू सहकारी लिमिटेडया आकार बीगु ज्या जुइ ।

थ्वहे अवधारणा कथं येँ मनपाया भित्री शहर दुने लाःगु फुक्क हे पुलांगु वस्तीयात एकीकृत रुपं विकास याना वनेगु झीगु तातुना खः । थ्व ज्यायात येँ महानगरपालिकां नं थःगु हे ज्या भाःपाः ग्वाहालि याना वनेमाः धइगु झीगु इनाप खः ।

( च्वमि एकीकृत वस्ती पुनः निर्माण अभियानया कजि खः । )

फाइल किपाः

Categorized in बिचा: