nepal life

येँया धर्मकीर्ति विहारय् अमेरिकी कवियित्री बिला सेनेवर्ग

नेवा: अनलाइन न्युज – विजयरत्न | २०७४ माघ २९, सोमबार १६:४०:०४

येँया श्रीघलय् च्वंगु धर्मकीर्ति विहारय् अमेरिकन बुद्धिष्ट कविपिनिगु चिनाखँ बिषयस छगू प्रवचन ज्याझ्वः जूगु दु ।

धर्मकीर्ति विहारया नायः धम्मवती गुरुमांया नायःसुइ न्ह्याःगु उगु ज्याझ्वलय् न्वःवायेगु झ्वलय् नेपालभाषा परिषदया इनापय् झायादीम्ह अमेरिकी कवयित्री विला सेनेबर्गं अमेरिकाय् च्वंपिं कविपिन्सं नं बुद्ध शिक्षाया प्रभावय् आपालं चिनाखँ च्वयातःगु खँया जानकारी बिसें थौंकन्हय् लोकं ह्वानाच्वंगु हाइकु नं जापानी बौद्ध भिक्षुपाखें हे पलाः न्ह्याःगु खँ कनादिल ।

अमेरिकी कविपिन्सं च्वयातःगु हाइकु व चिनाखँ नं ब्वनाः न्यंकादीगु खः । ज्याझ्वलय् ब्वति कयादीपिन्सं तयादीगु थीथी न्ह्यसःया लिसः नं वय्कः कवयित्री मय्जु बिला सेनेबर्गं बियादीगु खः ।

ज्याझ्वलय् मुँज्या नायः धम्मावती गुरुमां नं पाहाँ कवियित्री मय्जु बिला सेनेबर्गयात मतिनाया चिं लःल्हाना बिज्यासे हनाबना यानाबिज्याःगु खः ।

धम्मावती गुरुमां नं पञ्चशील पाठ यानाः बिज्याये धुंकाः कोषया ल्यूदांभरिं अरुणसिद्धि तुलाधरंं ज्याझ्व न्ह्याकादीगु उगु ज्याझ्वलय् छयाञ्जे प्रफुल्ल कमल ताम्राकारं लसकुस न्वचू बियादीगु खःसा दुजः नबिन चित्रकारं अमेरिकी कवयित्री बिला सेनेबर्गया म्हसीका न्ह्यब्वयादीगु खः ।

बुद्धया जन्मभूमि नेपालय् वयाः बौद्धधर्मया चिनाखँयात कयाः सहलह याये खनाः तसकं लसता पिज्वःगु नापं नेपाः वयाः स्वनिगःया थीथी एतिहासिक थाय्त स्वयेखनाः तसकं लय्ताःगु खँ नं कनादिल ।

कवयित्री बिला सेनेबर्गया थुगु नेपाः भ्रमणया झ्वलय् खुगू ब्यागलं ब्यागलं ज्याझ्वलय् ब्वति कयादिसे सहलह ब्याकादीगु खः ।

किपाः सुरेशमान डंगोल

Categorized in कला