nepal life

येँया ताहाःननीइ ८८ दँ पुलेधुंकूपिं ज्याथःजिथिपिन्त हनेज्या

नेवा: अनलाइन न्युज | २०७४ मङ्सिर ११, सोमबार १५:१५:११

बिगेन तुलाधर

ताहाःननी मिसा पुचः व ताहाःननी युवा पुचःया मंका ग्वसालय् शनिवाः ८८ दँ पुलेधुंकूपिं ज्याथःजिथिपिन्त हनेगु ज्याः तःजिक याःगु दु ।

ताहाःननी युवा पुचःया नायः दिनेशमान डंगोलया सभापतित्वय् न्ह्याःगु उगु ज्याझ्वलय् मूपाहाँ कथं मेयर विद्यासुन्दर शाक्य झायादीगु खः ।

अथेहे, पाहाँकथं क्षेत्र नं. ८ या वामगठबन्धनया प्रत्यक्ष उम्मेदवार जीवनराम श्रेष्ठ, क्षेत्र नं. ८ क या प्रतिनिधि सभाया उम्मेदवार राजेश शाक्य, वडा नं. २२, २४, १८ वडानायःपिं झायादीगु खः ।

ज्याथःजिथिपिन्त सम्मान यायेगु झ्वलय् ज्याझ्वःया संयोजक दिनेशमान डंगोलं दोसल्ला न्ययेकाः स्वांमाः क्वखायेका लिसें मूपाहाँ विद्यासुन्दर शाक्यं दसिपौ लःल्हायेगु ज्या जूगु खःसा उगु ज्याझ्वलय् २२ म्हेसित सम्मान यायेगु ज्या जूगु खः ।

उगु ज्याझ्वलय् स्थानीय वासिन्दापिन्सं फूचाकथं सिसाबुसा, विस्कुट, आर्थिक ग्वाहालि विया नं ग्वहालि याःगु खः । ज्याझ्वलय् थःगु मन्तब्य तयेगु झ्वलय् येँया मेयर विद्यासुन्दर शाक्यं महानगरपालिकां बियाः वयाच्वंगु ८८ दँ दुपिं ज्याथःजिथिपिन्त १२,००० खःसा आः दँ म्हो याना मिस्तय्त ७५ दँ व मिजंपिन्त ८० दँ पुलेधुंकूपिन्त नं १२,०००  तका दां बिइगु खँ न्ह्यथनादिल ।