nepal life

येँया क्षेत्र ल्याः ८ य् जोशी व श्रेष्ठया धेंधेंबल्ला कासा

नेवा: अनलाइन न्युज | २०७४ कार्तिक २४, शुक्रबार १०:०९:५६

बहुदलकालया स्वंगू चुनावय् स्वक्वःतक लालकिल्ला तर लिपांगु निगू संविधानसभा चुनावय् मद्दिक्क कांग्रेसया वर्चश्व । येँ–८ या चुनावी माहोल बय् बय् यायेत इतिहासया थुगु निगू दृष्टान्त पर्याप्त जू ।

कांग्रेसया नवीन्द्रराज जोशी व एमालेया जीवनराम श्रेष्ठ थ्वहे ‘दृष्टान्त दोहोरे यायेगु’ योजनाय् दु । २०६४ व २०७० या संविधानसभा निर्वाचन त्याकूम्ह जोशी न्ह्यःने श्रेष्ठया बल्लाःगु ख्याच्वः दु ।

२०४८, २०५१ व २०५६ सालया आमनिर्वाचनय् धाःसा थुगु क्षेत्र एमालें त्याकूगु खः । जोशी ह्याट्रिक यायेगु तयारीइ दुसा श्रेष्ठ कांग्रेस किल्ला थुनेगु सुरय् ।

२०४६ सालय् प्रजातन्त्र पुनःस्थापना जुइधुंकाः २०४८ सालय् जूगु न्हापांगु आमनिर्वाचनय् गणेशमान सिंहया काय् प्रकाशमान सिंह व नेपाल कम्युनिष्ट पार्टीया संस्थापक महासचिव पुष्पलालया जहान सहाना प्रधानदथुइ थ्व क्षेत्रय् प्रतिस्पर्धा जूगु खः । उगु इलय् प्रधान विजयी जूगु खः । वधुंकाः २०५१ सालया मध्यावधिइ एमालेया हे राजेन्द्र श्रेष्ठ व २०५६ सालया आमनिर्वाचनय् नं एमालेया हे मंगलसिद्धि मानन्धरं त्याकूगु खः ।

आः वयाः जोशी व श्रेष्ठ निम्ह थःथःगु जितय् ढुक्क जूगु खनेदु । येँया क्षेत्र ल्याः ८ या निर्णायक कथं कयातःगु १५ नम्बर वडाया डल्लु आवास क्षेत्रय् बिहिवाः घरदैलो यानाच्वंगु इलय् नापलाःम्ह कांग्रेस उम्मेदवार नवीन्द्रराज जोशीं थःपिं त्याइगुलि ढुक्क जूगु खँ कनादीगु खः ।

वय्कः जोशीं धयादी, “राजनीतिक व सामाजिक रुपय् समर्पित जूम्ह मनूयात थनया जनतां बांलाक्क हे छुटे याइ, जिं थ्व समाजया नितिं छु गुज्वःगु ज्या यानागु दु धैगु थनया जनतां स्वयाच्वंगुलिं जितः न्याय याइ धैगुलि विश्वस्त जुयागु दु ।”

जोशीं डल्लु आवास क्षेत्रय् बुधवाः जक चुनाव प्रचारप्रार समितिया ज्याकुथि पलिस्था यानाः औपचारिक रुपं चुनावी अभियान न्ह्याकूगु खः । जोशीं डल्लु आवास क्षेत्रपाखें घरदैलो न्ह्याकाच्वंगुु इलय् प्रतिस्पर्धी एमालेया जीवनराम श्रेष्ठ धाःसा अनौपचारिक नापलायेगु ज्याय् हे व्यस्त जुयाच्वंगु दु ।

(थौं ने.सं. ११३८ कार्तिक २४ गते शुक्रवाः अन्नपूर्ण पोष्ट न्हिपती पिदंगु बुखँ)

Categorized in पत्रपत्रिका