nepal life

येँपाखें नवलपरासी वंगु गाडी मलेखुइ दुर्घटना

नेवा: अनलाइन न्युज | २०७४ भाद्र २७, मंगलबार १५:५७:२१

मलेखु धादिङया विशालटार लिक्क मंगलवाः सुथय् जूगु दुर्घटनाय् घाःपाः जूपिंमध्ये निम्ह मनूया वासः याकाच्वंगु इलय् ज्यान वंगु दु ।

इलाका प्रहरी ज्याकुथि गुजुरीया प्रहरी निरीक्षक बरुण सि.हया कथं घाःपाः जूगु अवस्थाय् येँय यंकूपिं नवलपरासी जिल्ला सुस्ता गाउँपालिका–५ निवासी ६५ दँया रमाशंकर सिंह व ३० दँया बच्चुरामया ज्यान वंगु खः । रमाशंकरया स्टार अस्पताल बल्खु व बच्चुरामया ट्रमा सेन्टर, बीर अस्पतालय् ज्यान वंगु खः ।

येँपाखें ४४ म्ह यात्रु ज्वनाः नवलपरासीया त्रिवेणीया नितिं वंगु लु२ख ६६३० ल्याःया यात्रुबाहक बस धादिङया बेनीघाट रोराङ गाउँपालिका–५ य् च्वंगु लँपुपाखें थ्यंमथ्यं १०० मिटर क्वय् कुतुंवनाः दुर्घटना जूगु खः । दुर्घटनाय् ३१ म्ह यात्रुपिं घाःपाः जूगुलि वासः यायेगु नितिं च्याम्हेसित ट्रमा सेन्टर छ्वःगु खः । ट्रमा सेन्टर छ्वःपिं घाःपाः जूपिंमध्ये एम्बुलेन्स चालकं थःयथे स्टार अस्पतालय् तकं यंकूगु खः ।

न्याम्हेसिगु स्टार अस्पताल, छम्ह ट्रमा सेन्टर, प्यम्ह गजुरीया प्राथमिक स्वास्थ्य केन्द्र व ल्यंदुपिनिगु राजमार्ग सामुदायिक अस्पताल मलेखुइ वासः जुयाच्वंगु प्रहरीं जानकारी ब्यूगु दु ।

Categorized in दुर्घटना-अपराध