nepal life

यलया लबिम मलय् “वाइवाइ सिटी”या आउटलेट

नेवा: अनलाइन न्युज | २०७४ कार्तिक २१, मंगलबार १३:०५:५७

चौधरी ग्रुपं नुडल्स बारया अवधारणालिसें नेपालय् न्हापांगुखुसि ‘वाइवाइ सिटी’ संचालनय् हःगु दु । ग्रुप अन्तर्गतया सिजी रिटेल प्रा.लिं. यलया पूच्वय् च्वंगु लबिम मलय् क्विक सर्भिस रेष्टुरेन्ट (क्यूएसआर)या रुपं ‘वाइवाइ सिटी’या आउटलेट संचालय् हःगु खः ।

ग्रुपया प्रबन्ध निर्देशक निर्वाणकुमार चौधरीं उगु आउटलेटया सोमवाः उलेज्या यानादीगु खः । दशकौंनिसें हरेक उमेर समूह दुने लोकप्रिय जुयाच्वंगु वाइवाइ चाउचाउयात नवीनतम ढंगं ग्राहक दथुइ यनेत ‘वाइवाइ सिटी’या परिकल्पना हयागु प्रबन्ध निर्देशक चौधरीं धयादिल ।

नेपाः जक मजूसे विदेशय् तकं सर्वाधिक रुपं विक्री वितरण जुयाच्वंगु वाइवाइ चाउचाउयात थीथी स्वाद व आकर्षक ढंगं यंकेत ‘वाइवाइ सिटी’ ताःलाइगु वय्कःया विश्वास दु ।

ग्रुपया कार्यकारी निर्देशक व सिजी रिटेल प्रा.लि.या प्रमुख कार्यकारी अधिकृत वरुण चौधरीं नवीनतम स्वाद, चुस्त सेवा व पाय्छिगु लकसया हुनिं ‘वाइवाइ सिटी’ चीहाकःगु इलय् हे पासाभाई व छेँजः मुनेगु इलय् दकले न्हापांगु ल्यज्या रुपं जुइगुलि थःपिं धुक्क जूगु धयादिल ।

भारत व नेपालय् यानाः ‘वाइवाइ सिटी’या झिंप्यंगू आउटलेट दु । भारतया दिल्ली, सिलिगुडी, चण्डीगढ, हैदराबाद, कोलकता, चेन्नाइ, पुने लिसेंया सहरय् संचालित ‘वाइवाइ सिटी’ आः याकनं हे नेपाःया इटहरी, धरान, भरतपुर, पोखरा, विराटनगर, विर्तामोड व भारतया आगरा, लखनउ, मुम्बई, देहरादुन लिसेंया सहरय् संचानलय् हयेगु योजना दयेकूगु दु ।

थ्वबाहेक वइगु न्यादँया दुने अमेरिका, बेलायत, अष्ट्रेलिया, जर्मनी, मलेसिया व मध्यपूर्वी देसतय्के द्वःछि व न्यासः ‘वाइवाइ सिटी’ संचालनय् हयेगु योजना कम्पनीं दयेकूगु दु ।

‘वाइवाइ सिटी’इ क्लासिक, चप्सी, रोस्टेड व प्यान फ्राइड यानाः प्यंगू थरीया चाउचाउया लिसें सोय गार्लिक, कुङपाउ, मसाला फ्युजन, हट गार्लिक, पेपर सोया, स्पाइसी तेरियाकी, सेज्वान चिली यानाः न्हय्गू स्वादय् सस, झिंच्यागू कथंया ताजा सागसब्जी, झिगू कथंया टपिङ व न्यागू कथंया एड अनपाखें ल्ययाः थःपिन्त यःगु स्वादय् थःगु हे न्ह्यःने दयेकाः परिकारया स्वाद कायेफइगु व्यवस्था यानातःगु दु ।

Categorized in बजाः