nepal life

म्ह्याय्या निंतिं न्हूगु पसः – डंगोल

ईश्वरमान डंगोल नेवाः जागरण मञ्चया छम्ह सक्रिय दुजःलिसें छम्ह कूशल व्यापारी, वय्कः नेवाः आन्दोलनया लिसेलिसें थःगु व्यवसाय नं न्ह्याकावयाच्वंगु दु । उमेरं ५६ दँ क्यंसां ल्याय्म्हत थें ज्या सनेफुम्ह डंगोल थनया प्याफलय् खुकुरी क्राफ्ट पसः चायेकाः च्वनाच्वनादीगु दु । वय्कलं थप थःगु व्यवसायकथं कन्हय्निसें क्षेत्रपाटीइ वंगलसिमाया नापं खुकुरी क्राफ्टया नामं हे मेगु पसः विधिवत् रुपं चायेकेत्यंगु दु । वय्कःलिसे जूगु खँल्हाबल्हा बहःचाहाकलं न्ह्यब्वयाच्वना । 

हानं मेगु पसः चायेकादी त्यन ? 

  • पसः चायेकेत्यनागु मू हुनिं थःगु निंतिं मखु, जितः ला प्याफलय् च्वंगु खुकुरी क्राफ्ट छगुलिं हे गाः । तर थ्व पसः जिमि तःधिकःम्ह म्ह्याय् सरिना डंगोलया निंतिं चायेकागु खः । 

म्ह्याय्या निंतिं धकाः पसः छाय् चायेकादिया ?  

  • म्ह्याय्मस्त इलं इहिपाः याना छ्वयेमाः । तर जिं इहिपाः न्ह्यः थः म्ह्याय्यात आर्थिकरुपं सम्पन्न यायेगुलिसेलिसें लजगाःया व्यवस्था यानाः जक इहिपा यानाबीगु धइगु मनंतुनाः पसः चायेकाबियागु खः । खय्त ला जिमि म्ह्याय् कमर्शया विद्यार्थी खः । सरकारी जागिर नकेगु कुतः नं यक्व याना । तर थ्व कुतः आःतक ताःलाःगु मदुनि । उकिं म्ह्याय्यात तुतिं चुइकेगु निंतिं हे थ्व पसः चायेके त्यनागु खः । 

अय्सा काय् व म्ह्याय् बराबर धइगु बिचाःयात व्यवहारय् नं लागु यानादिल थें च्वं ? 

  • आर्थिक रुपं बमलायेकं छुं नं याये फइमखु । मेता काय् जुइमा, म्ह्याय् जुइमा थौंया जमानाय् आर्थिक स्थिति बांलायेमाः । थःम्हेस्यां बुइकापिं मस्तय्त लँ क्यनाः वनेमाः । थ्वहे हुनिं जिमि म्ह्याय् काय् उथें खः । बुलुहुँ बुलुहुं पसःया ज्या सयेका यंकी । 

खुकुरी क्राफ्टया मू व्यापार छु खः ? 

  • हलिमय् हे नेपाः देय्या मौलिक हतियारकथं खुकुरी धकाः म्हस्यू । थ्वहे खुकुरी नेपाः दुने जक मखु, हलिमय् न्यंकं हे नांजाःगु वस्तु खः । उकिं खुकुरी क्राफ्टया मू ब्यापार धइगु थीथी कथंया खुकुरी दयेकाः मीगु ज्या खः । लिसें खुकुरी क्राफ्ट आः छुं भचा धातुया हस्तकलापाखें निर्मित द्यःत नं मीगु यानावयाच्वनागु दु । 

निगू निगू पसः स्वयाः नं नेवाःतय् आन्दोलनय् गथे यानाः ई बियाच्वना दिया ?

  • छगू ला गन इच्छा दइ अन ई बी फइगु जुयाच्वन । ततःधंगु नेवाःतय्गु आन्दोलनय् पसलय् मेपिं हे तयाः नं ब्वति कायेगु याना । गुगु नं ज्याझ्वलय् व्यस्तताया कारणं इलय् थ्यंके मफुसां वनेमाः धकाः वनेगु यानाच्वनागु दु । नेवाः आन्दोलनया मेगु तःता छुं यायेमफुसां छ्यंग्वः खाकेगु ज्या चाहिं यानाच्वनागु दु । 

अन्तय् छुं धायेगु दु कि ? 

  • व्यापार व्यवसाय, परिवारया नापनापं राजनीति, नेवाः आन्दोलन, सामाजिक सेवाय् झीसं मन बीमाः । व्यापार जक धयाः च्वनाच्वने मज्यू । जिगु बिचाः थथे हे दु ।