nepal life

म्यादी प्रहरी जुइपिं १५० म्ह युवा बेपत्ता

नेवा: अनलाइन न्युज | २०७४ कार्तिक ७, मंगलबार ११:४०:०१

आसन्न प्रतिनिधि सभा व प्रदेश सभा निर्वाचन परिचालनया नितिं अछामय् म्यादी प्रहरी जुइपिं युवामध्ये १५० म्ह सम्पर्कय् हे मवःगु सीदूगु दु । म्यादीया नितिं फाराम भरे याःपिं थुलि आपालं ल्याखय् युवापिं अनुपस्थित जूगु खः ।

अछामय् मुक्कं २,३१६ म्ह युवापिन्सं म्यादी प्रहरीया नितिं आवेदन ब्यूगुलि छनौटया न्हापांगु चरण अन्तर्गत आइतवाः व सोमवाः स्वास्थ्य परीक्षण व मेमेगु शारीरिक जाँच व ब्वाकासा क्वचाःगु खः ।

स्वास्थ्य परीक्षण व शारीरिक जाँचया लिच्वः पिकयाः थौं मंगलवाः लिखित परीक्षा जुइगु अछामया प्रहरी प्रमुख प्रहरी नायब उपरीक्षक दधिराम न्यौपानें जानकारी ब्यूगु खः ।

अछामया नितिं मुक्कं १,२३४ म्ह म्यादी प्रहरी छनौट याये दइगु कोटा दूगु प्रहरी नायब उपरीक्षक न्यौपानें धयादीगु दु । थप २० प्रतिशतयात वैकल्पिकय् तयेगु खँ नं धाःगु दु । छनौट जुइधुंकाः नं गुलिस्यां दथुइ हे त्वःतीगु अवस्थायात ध्यानय् तयाः वैकल्पिक नं तःगु खः ।

निर्वाचन परिचानलया नितिं भर्ना जुइपिं म्यादी प्रहरीं ५५ दिं ज्या यायेमाःगु व इमिसं उगु अवधिया पारिश्रमिक नेपाल प्रहरीया जवानं काइगु सरह अर्थात् ५१,००० तका दां जुइगु प्रहरीं जानकारी ब्यूगु दु ।

Categorized in लजगाः