nepal life

म्यादी प्रहरीइ जागिर चाल

नेवा: अनलाइन न्युज | २०७४ आश्विन २४, मंगलबार १२:२५:०२

दलीय सदस्यता कयातःपिन्सं नयेखनी मखु म्यादी प्रहरीया जागिर

  • दरखास्त म्याद असोज ३० गतेतक
  • छनौट कार्तिक ५ निसें ८ गतेतक
  • १८ दँनिसें ५४ दँ मपूनीगु उमेरया जुइमाःगु

सरकारं वइगु प्रतिनिधि सभा व प्रदेशसभा निर्वाचनयात लक्षित यासें म्यादी प्रहरीया भर्ना आह्वान याःगु दु । प्रहरी प्रधान ज्याकुथिं मंगलवाः छगू सुचं पिथनाः गुइच्याद्वः निसः व खुइच्याम्ह (९८,२,६८) म्यादी  प्रहरीइ भर्ना आह्वान याःगु खः ।

मंदुपिं उम्मेदवारं मंगलवाःनिसें दरखास्त बिइफइगु व्यवस्था यानातःगु दु । दरखास्त न्हय् न्यागूलिं जिल्लाया प्रहरी ज्याकुथिपाखें बिइफइगु व्यवस्था प्रहरी प्रधान ज्याकुथिं मिलेयाःगु दु । स्वनिगःया हकय् धाःसा प्रहरी परिसरपाखें आवेदन बिइफइगु व्यवस्था याःगु दु । प्रधान ज्याकुथिं दरखास्तया म्याद असोज ३० गतेतकया नितिं ब्यूगु दु ।

झिंच्यादँ पूवनाः न्यय् प्यदँ मपूनिम्ह नेपाली नागरिकं म्यादी प्रहरीया दरखास्त बिइफइगु व्यवस्था दुसा उम्मेदवार सुं नं राजनीतिक दलय् आबद्ध मजूपिं जुइमाःगु व्यवस्था याःगु दु ।

उम्मेदवार नैतिक पतन खनेदूगु फौजदारी अभियोगय् कसुर ठहर मजूगु व शारीरिक व मानसिक रुपं तन्दुरुस्त जुइमाःगु व्यवस्था नं याःगु दु । शैक्षिक योग्यताया हकय् धाःसा साधारण च्वये ब्वने सःसां गाःगु ब्यवस्था याःगु दु ।

म्यादी प्रहरीया छनौट कार्तिक ५ गतेनिसें ८ गतेतकया दुने क्वचाइगु  प्रहरी प्रधान ज्याकुथिया कार्यतालिकाय् न्ह्यथनातःगु दु ।

म्यादी प्रहरीं नेपाल प्रहरीया जवान सरह ५५ दिंया पारिश्रमिक, राशन व स्थानीय भत्ता कायेखनी ।

Categorized in लजगाः