nepal life

मेयर शाक्यं दुम्बो चुकय् एकीकृत वस्ती निर्माणया नितिं स्थलगत निरीक्षण

नेवा: अनलाइन न्युज – ललेन्द्र शाक्य | २०७४ मङ्सिर ११, सोमबार १४:३७:३७

येँ महानगरपालिकाया मेयर विद्यासुन्दर शाक्यं तःभुखाय् लिपा पाइलट प्रोजेक्ट कथं येँया १८ वडाय् निर्माण यायेत्यंगु प्रस्तावित एकीकृत वस्ती पुनःनिर्माण अभियानया नितिं स्थलगत निरीक्षण यानादीगु दु ।

एकीकृत वस्ती पुनःनिर्माण अभियान न्ह्याकाः वयाच्वंगु थुगु ज्या ताःलाकेगु नितिं येँ महानगरपालिकाया मेयर भाजु शाक्यं प्रस्तावित लागाय् वयाः निरीक्षण यानादीगु खः । लिसें वय्कलं थुगु अभियानया उपभोक्तापिं नाप अन्तरक्रिया नं यानादीगु खः ।

अन्तरक्रियाया झ्वलय् स्थानीय उपभोक्तापिन्सं ताःई लिपा नं एकीकृत वस्ती निर्माणया ज्या न्ह्याकेमफूगु एकीकृत वस्ती जुइगु इलय् थःथःगु भागय् लाइगु छेँ विस्कं स्वाहाने तयेमखनीगुया लिसें थीथी समस्यात न्ह्यःने तःगु खः ।

भाजु शाक्यं एकीकृत वस्ती थौंया आवश्यकता जूगु विचाः प्वंकादिसें नेवाः वस्ती व सम्पदा ल्यंकातयेगु खःसा एकीकृत वस्ती अभियान ज्याझ्वः न्ह्याकेमाःगु विचाः नं प्वंकादीगु खः ।

वय्कलं याकनं हे प्राविधिक, कानूनविद्, इन्जिनीयर व उपभोक्ता दथुइ दुग्यंक सहलह यायेधुंकाः थुगु ज्या न्ह्याकेगु बचं बियादीगु खः । लिसें वय्कलं उपभोक्ताया इच्छा अःखः छुं नं कथंया निर्णय मयायेगु विचाः नं प्वंकादीगु खः ।

अथेहे, एकीकृत वस्ती पुनःनिर्माण अभियानया कजि मचाराजा महर्जनं थुगु अभियानपाखें नेवाः वस्ती ल्यनीगु व नेवाःत थःगु हे थासय् आर्थिक समृद्धि जुइगु जूगुलिं थःपिं थ्व अभियानय् न्ह्यचिलागु जानकारी बिसें उपभोक्तापिनिगु विचाः स्पष्ट वयेवं थ्व ज्या यायेत अःपुइगु खँ तयादिल ।

वय्कः भाजु महर्जनं येँ महानगरपालिकापाखें थुगु ज्याया नितिं गुलि फु उलि याकनं थ्व अभियान न्ह्याकेत इनाप यानादीगु खः ।

ज्याझ्वलय् अभियानया दुजः सुजीव बज्राचार्यं एकीकृत वस्ती बाहेक मेगु विकल्प मखंगु विचाः तयादिसें थ्वसिबें बांलाःगु मेगु लँपु दुसा व खँय् नं सहलह ब्याकाः न्ह्यःने वनेगु विचाः तयादीगु खः ।

उगु ज्याझ्वलय् १८ वडाया वडाध्यक्ष न्हुच्छे महर्जनं वडाबासी पिनिगु भावना व एकीकृत वस्तीया नितिं यायेत्यंगु ज्याखँया पूर्ण अध्ययन लिपा वडावासीनाप सहलह ब्याकाः थुगु ज्या न्ह्याकेगु खँ तयादीगु खः ।

(एकीकृत वस्तीयात कयाः मेयर शाक्यया विचाः स्वयादिसँ)

Categorized in स्थानिय-समाज