nepal life

मिस युनिभर्सय् नेपाःया नग्मा श्रेष्ठ

नेवा: अनलाइन न्युज | २०७४ कार्तिक १७, शुक्रबार १२:१८:५८

संसारया हे थिकेगु ब्यूटी प्याजेन्ट कथं कयातःगु मिस युनिभर्सय् नेपाःपाखें न्हापांगुखुसि सहभागिता क्यनीगु जूगु दु ।

सन् २०१२ या मिस नेपाल फस्ट रनर अप नग्मा श्रेष्ठं मिस युनिभर्सय् नेपाःया प्रतिनिधित्व याइगु जूगु दु । बुधवाः येँय् ग्वसाः ग्वःगु ज्याझ्वलय् द हिडन् ट्रेजरं मिस युनिभर्सय् नेपाःया प्रतिनिधित्व बारे जानकारी ब्यूगु खः ।

द हिडन् ट्रेजरया गोपाल सुन्दरलाल कक्षपतिं धयादी, “द हिडन् ट्रेजरं ग्वसाः ग्वइगु मिस नेपाल कासापाखें छनोट जूपिं उत्कृष्ट कासामिं संसार न्यंकंया थीथी ब्यूटी प्याजेन्टय् नेपाःया प्रतिनिधित्व यानाः वयाच्वंगु दु । थ्वहे अन्तर्गत नेपालं न्हापांगुखुसि संसारया हे थिकेु ब्यूटी प्याजेन्ट कथं कयातःगु मिस युनिभर्सय् नेपाःया प्रतिनिधित्व याकेत्यनागु दु । सन् २०१२ या मिस नेपाल फस्ट रनर अप नग्मा श्रेष्ठं मिस युनिभर्सय् नेपाःया प्रतिनिधित्व यायेत्यंगु दु । मिस युनिभर्स कासाय् सहभागिता प्वंकेत नेपालं फुक्क तयारी पूवंके धुंकूगु दु ।”

मिस युनिभर्सय् सहभागी जुइत ग्वसाः खलकं वार्षिक रुपं १५ लख तका पुलेमाःगु प्रावधान दु ।

वइगु मंसीर १० गते जुइत्यंगु ६५ क्वःगु मिस युनिभर्सय् नग्मा श्रेष्ठं नेपाली डिजाइनर विना घले व विजय महर्जनं तयार याःगु स्वंगू केजीया विश्व शान्ति कामनालिसेंया मन्दःया क्राउन व फ्याव्रिकया छ्यलाबुला यानातःगु ड्रेस पुनीगु जुइ ।

मिस युनिभर्स नग्मा श्रेष्ठं धयादी, “थीथी ब्यूटी प्याजेन्टय् सहभाी जुइधुंकाः मिस युनिभर्सय् न्हूगु शैलीं नेपाःया प्रतिनिधित्व यायेगु सल्लाह कथं डिजाइरपिंलिसे सहकार्य यानागु खः । सामान्य खनेदइगु नेपाली परम्परागत भेषभूषाय् मन्दःया क्राउन छ्यलाः मिस युनिभर्सय् न्ह्यब्वयेगु जुइ । मिस युनिभर्सय् छुं विधाय् धेंधेंबल्ला मजुइगु जुयाः उत्कृष्ट ड्रेसया डिजाइनय् डिजाइनरपिंलिसे ज्या यानाच्वनागु दु । मिस युनिभर्सया फाइनलय् नेपाली ढाका व फ्याब्रिकया छ्यलाबुला यानातःगु डिजाइनयात न्ह्यब्वयेगु जुइ ।”

नग्मा श्रेष्ठ वइगु सोमवाः मिस युनिभर्सय् सहभागी जुइत अमेरिकाया लस भेगास प्रस्थान याइगु ज्याझ्वः तयातःगु दु । नग्मां मिस युनिभर्सय् पुनीगु ड्रेस उत्कृष्ट जूगु जानकारी डिजाइनर विना घलें बियादीगु दु ।

डिजाइनर विना घलें धयादी, “संसारया थिकेगु कथं कयातःगु मिस युनिभर्सय् नेपालं सहभागिता क्यनेत वनेत्यंगु दु । नेपाःया प्रतिनिधित्व यानादीम्ह नग्मा श्रेष्ठया व्यक्तित्व व नेपाः म्हसीकीगु पहिरनया रुपं मन्दःया डिजाइनं जाःगु क्राउन व फ्याब्रिक छ्यलाबुला यानातःगु परम्परागत ड्रेस तयार यानागु दु । थ्व ड्रेस तयार यायेत थ्यंमथ्यं लच्छि ई तूगु दु । मिस युनिभर्सय् राष्ट्रिय पहिरनं महत्वपूर्ण भूमिका म्हितीगु जुयाः उत्कृष्ट ड्रेस तयार यायेत मेहनत यानाच्वनागु दु ।”

मिस युनिभर्सय् नेपाःलिसें ९५ गू देसं सहभागिता प्वंकीगु जूगु ुदु । नेपाःलिसें क्याम्बोडिया, लाओस व अर्मानियां न्हापांगुखुसि उगु मिस युनिभर्स कासाय् ब्वति कायेत्यंगु खः ।

Categorized in कला