nepal life

महेश्वर महर्जन व ननिता महर्जनया खेलकुद मन्त्रीपाखें सम्मान

नेवा: अनलाइन न्युज – ललेन्द्र शाक्य | २०७४ श्रावण १७, मंगलबार १४:२२:४९

महेश्वरयात १ लख व ननितायात ३५ द्वः तका नेपाल सरकारपाखें लःल्हात

युवा–खेलकुद मन्त्री राजेन्द्रकुमार केसीं बडिबिल्डिङ कासामिपिन्त दसिपौं व नगद लःल्हानाः हनेगु ज्या याःगु दु ।

खेलकुद मन्त्रालयस जूगु उगु ज्याझ्वलय् स्वर्णपदक विजेता महेश्वर महर्जन व कास्य पदक विजेता ननिता महर्जनपिन्त उकथं हनेगु ज्या याःगु खः ।

बि.सं. २०४० साल पौष ९ गते जन्म जुयादीम्ह महेश्वर महर्जन येँया १९ वडा ढोकाटोलय् च्वनादीम्ह खः ।

महेश्वर महर्जन सन् २०१६ सेप्टेम्बर २ निसें ८ तक भुटानया राजधानी थिम्पुइ जूगु २८ गू राष्ट्र दुथ्याःगु  ३० औं एसियन बडिबिल्डिङ एण्ड फिजिक्यू स्पोर्टस च्याम्पियनशीप–२०१६ स नेपाःया पाखें ७५ केजी तौल समूहस स्वर्ण पदक त्याकेत ताःलाःम्ह कासामि खः ।

Nepal’s Maheshwor Maharjan (centre) celebrates on the podium after winning gold medal in the 50th Asian Body Building Championship in Thimpu on Tuesday, September 6, 2016.

महेश्वर महर्जनं नेपाःया नां धःस्वाकेत यानादीगु योगदान कथं नेपाल सरकारं खेलकुद सिरपाः व सम्मान कार्यविधि २०७२ कथं नगद १ लख तकालिसें दसिपौ लःल्हाःगु खः ।

अथेहे, बि.सं. २०४१ साल असोज ३ गते जन्म जुयादीम्ह ननिता महर्जन किपूया १० वडा, तःननी–न्हूबजारय् च्वनादीम्ह खः ।

सन् २०१६ नोभेम्बर २९ निसें डिसेम्बर ५ तक थाईल्याण्डय् जूगु ५९ गू राष्ट्रया सहभागिता दूगु ८ औं डब्ल्यूबीपीएफ– वर्ल्ड बडिबिल्डिङ एण्ड स्पोर्टस् फिजिक्यू च्याम्पियनशीप या एथ्लेटिक फिजिक्यू मिसा धेंधेंबल्लाय् कास्य पदक त्याकेत ताःलाःम्ह कासामि खः ननिता महर्जन ।

Nepali woman bodybuilder Nanita Maharjan (right) poses for a group photo with Mongolia’s Gambaga and Uzbekistan’s Nurayeva Alena after the eighth WBPF World Bodybuilding and Physique Sports Championships in Pattaya, Thailand on Sunday, December 4, 2016. Photo courtesy: NSC

नेपाःया इतिहासय् अन्तर्राष्ट्रिय कासाय् मिसा शारिरीक सुगठन कासामिं त्याकूगु ननिताया कास्य पदक हे न्हापांगु पदक कथं ऐतिहासिक रुपं धस्वायेत ताःलाःगु खः ।

ननिता महर्जनया थुज्वःगु ज्वःमदुगु प्रतिभां पिज्वःगु योगदानयात कदर यासें नेपाल सरकारं खेलकुद व सम्मान कार्यविधि २०७२ कथं नगद सिरपाः कथं ३५,००० तका दां व दसि पौ लःल्हाःगु खः ।

किपाः नेवाः अनलाइन न्यूज

Categorized in कासा