nepal life

मस्कों ७१ म्ह यात्रु ज्वनाः ब्वःगु विमान दुर्घटना जुल

नेवा: अनलाइन न्युज | २०७४ माघ २९, सोमबार १५:०७:०७

मस्कों रसियाया पश्चिमी क्षेत्रया नितिं ब्वःगु १४८ म्ह यात्रुभार क्षमताया छगः विमान आइतवाः विमानस्थलपाखें ब्वःगु छुं ईया दुने दुर्घटनाग्रस्त जूगु दु ।

विमानय् च्वंपिं खुम्ह चालक दलया दुजःलिसें फुक्क यानाः ७१ म्ह यात्रु जीवित जुइफइगु आशा गौण जूगु रसियाली अधिकारीपिन्त उद्धृत यासें इन्टरफ्याक्स न्यूज एजेन्सीं आइतवाः जानकारी ब्यूगु खः ।

विमान रसियाया राजधानी मस्कोय् च्वंगु डोमोडेडोभो विमानस्थलं रसियाया हे पश्चिमी ओरेन्वर्ग क्षेत्रया ओरस्कया नितिं ब्वःगु खः ।

विमान दुर्घटनास्थलय् रसियाली अधिकारी थ्यंके मफुनिगु तर विमान आर्गुनोभोया ग्रामीण इलाकाय् दुर्घटना जूगु जुइफूगु प्रारम्भिक अनुमान याःगु दु । विमान चालक दलया दुजः व यात्रुपिन्त जिवित लुइके मफइगु सम्भावना मदूगु स्रोतं जानकारी ब्यूगु दु ।

इन्टरफ्याक्सया मेगु छगू जानकारी कथं विमान दुर्घटनास्थलं निम्ह मनूया सीम्ह क्षतविक्षत अवस्थाय् लुयावःगु खबर दु । थुकिया सरकारी अधिकारीपिन्सं पुष्टी धाःसा याःगु मदुनि ।

रसियाली यातायात मन्त्रालयं इन्टरफ्याक्सयात ब्यूगु जानकारी कथं विमान दुर्घटना मौसम खराब जूगु हुनिं बाय् मानवीय कमजोरीया हुनिं लगायतया छुं मेगु हुनिं जूगु जुइफूगु खनेदूगु दु । अय्सां थुकिया बारे थप अनुसन्धान लिपा जक धायेफइगु मन्त्रालयं धाःगु दु ।

रसियाली छानबिन समितिं दुर्घटनाया हुनि अध्ययन यानाः प्रशासनयात प्रतिवेदन लःल्हायेत ज्या न्ह्याकेधुंकूगु धाःगु दु ।

रसियाली यातायात मन्त्री माक्सिम सोकोलोभ घटनाबारे थुइकेत व सीपिनि थःथितिपिन्त हःपाः बिइत दुर्घटनास्थलपाखे झायेधुंकूगु दु ।

आः उगु दुर्घटना जूगु विमानया भग्नावशेष मालेगु ज्या जुयाच्वंगु दु ।

मस्कोया पिनेया भेगय् च्वंगु च्वापुवा वयाच्वंगु क्षेत्रय् रुसया आपतकालीन उद्धारकर्तापिन्सं मालेगु ज्या यानाच्वंगु अधिकारीपिन्सं धाःगु दु ।

 

उगु विमानय् च्वनावंपिं खुम्ह चालक दलया दुजःलिसें ७१ म्ह यात्रुपिं सीधुंकूगु पुष्टि याःगु दु ।

थुगु हे वाः उगु क्षेत्रय् आपालं च्वापुवा वःगुलिं दुर्घटनाया हुनिं च्वापुवा हे जूगु अनुमान नं याःगु दु । तर आतंककारी आक्रमणया धाःसा छुं सम्भावना मदूगु दाबी याःगु दु ।
एन्टोजोभ एन–१४८ विमान मस्को पिने इलाकाय् च्वंगु रमेनस्काई जिल्लाय् कुतुंवंगु खः । उगु दुर्घटना राजधानीइ अवस्थित विमानस्थल डोमोडेडोभोपाखें स्थानीय ई कथं आइतवाः न्हिनय् २ः४८ ता इलय् विमान ब्वःगु छुं ई दुने हे उगु घटना जूगु खः ।

उगु दुर्घटनाय् लानाः ६५ म्ह यात्रु व खुम्ह चालक दलया दुजः सीगु रुसया यातायात अनुसन्धान विभागं जानकारी ब्यूगु दु । उगु दुर्घटनाय् लानाः स्वम्ह मचात नं सीगु जानकारी ब्यूगु दु ।

(थन क्लीक यानाः भिडियो स्वयादिसँ)

Categorized in अन्तर्राष्ट्रिय