nepal life

मनीता श्रेष्ठ व इन्द्रबहादुर श्रेष्ठ उत्कृष्ट कासामि

नेवा: अनलाइन न्युज | २०७४ पौष २४, सोमबार १६:४१:४०

नेपाल आर्मीया मनीता श्रेष्ठ प्रधान व बन्दी सहायता नियोग ‘पाम’या इन्द्रबहादुर श्रेष्ठ राष्ट्रिय खेलकुद परिषद च्याम्पियनसिप अन्तर्गत १५ क्वःगु राष्ट्रिय जुडो कासाय् उत्कृष्ट कासामि घोषित जूगु दु ।

कासाया न्हापांगु दिं शनिवाः इन्द्रं मिजंपाखे ६६ केजी क्वय् व मनीतां मिसापाखे ५७ केजी क्वय् स्वर्ण त्याकूगु खः ।

कासाया लिपांगु दिं मिजं ६० केजीइ पामया रोशनबहादुर दोङं कर्मा लामा, ७३ केजी क्वय् नेपाल प्रहरीया सन्जित डंगोलं आर्मीया जंगबहादुर सारु, ९० केजीइ प्रहरीया श्रीराम माकःजुं आर्मीया रमेशचन्द व १०० केजी च्वय् प्रहरीया राजन जोशीं कञ्चनपुरया आशिष ओझायात बुकुसें स्वर्ण त्याकूगु खः ।

मिसापाखे ५२ केजी क्वय् एपीएफया देविका खड्कां प्रिमियर जुडो डोजोया अञ्जु पाण्डे, ६३ केजी क्वय् आर्मीया फुपुल्हामु खत्रीं आर्मीया हे निर्मला घतीमगर व ७८ केजी क्वय् आर्मीया पुनम श्रेष्ठं प्रहरीया भावना घतीमगयात बुकाः न्हाप जूगु खः ।

विजेतापिन्त राष्ट्रिय खेलकुद परिषदया सदस्य सचिव केशवकुमार विष्ट लिसेंयापिन्सं छगू ज्याझ्वःया दुथइ सिरपाः लःल्हाःगु खः । निन्हु जूगु उगु कासाय् थीथी १३ गू जिल्ला व ९ गू क्लबया ८७ म्ह मिजं व ४८ म्ह मिसालिसें १३५ म्ह कासामिपिन्सं १४ गू विधाय् धेंधेंबल्ला याःगु खः ।

Categorized in कासा