nepal life

मनराजा नकःमिया ‘ज्वभनया रंग’ आइतवाः न्यनेखनी

नेवा: अनलाइन न्युज – विजयरत्न | २०७४ मङ्सिर १५, शुक्रबार १५:११:४३

नेपालभाषा संगीत ख्यलय् जक मखु खस भाय्या संगीत ख्यलय् नं नांजाःम्ह संगीतकार मनराजा नकःमिया याकः संगीतय् ‘ज्वभनया रंग’ नांया म्येचाः पिदनीगु जूगु दु ।

यलया पाटन हस्पिटल न्ह्यःने च्वंगु ललितपुर मल लगंख्यलय् छगू ज्याझ्वः यासें सार्वजनिक जुइत्यंगु उगु म्येचाः ‘ज्वभनया रंग’ ने.सं. ११३८ थिंलाथ्व यःमरि पुन्ही (मंसीर १७ गते) आइतवाः सुथसिया ८ ता इलय् चिखिफ्यने ज्याझ्वः तयातःगु दु ।

संगीतकार मनराजा नकःमि म्येचाःया देवतय् थः हे तःधिकःम्ह म्ह्याय् नेवाः व खस भाषाया संकिपा ख्यलय् नांजाःम्ह नकिं आशिष्मा नकःमिया किपाः दुथ्याकातःगु दु ।

जनकवि दुर्गालाल श्रेष्ठ, नातिबज्र बज्राचार्य, तबः मरु, आनन्दरत्न बज्राचार्य, मंगल महर्जन, निर्मलरत्न शाक्य, चण्डेश्वर महर्जन, प्रकाशलाल जोशी, त्रिलोचन, धिर सुवाल, धर्मेन्द्र महर्जनपिनिगु च्वसा दुथ्याःगु म्येचाः ‘ज्वभनया रंग’ दुने हरिशरण साय्मि, बालकृष्ण वंशी, विनोद गुरुङ, जिवित जल्मी, संजय श्रेष्ठ, वीरेन शाक्य, बुद्ध साय्मि, भुपेन्द्र बज्राचार्य, संजय खड्गी, विजेन श्रेष्ठ, सुरेन्द्र श्रेष्ठपिं संगीत संयोजन व रेकर्डिष्ट जुयादीगु दु ।

थुगु म्येचाः दुने झी ख्यालिजुजु मदनकृष्ण श्रेष्ठलिसें नांजाःपिं म्येहालामिपिं सानुबाबु महर्जन, सतिश महर्जन, निशा देसार, रत्नशोभा महर्जन, सुलिन्द्र शाक्य, कविता जोशी श्रेष्ठ, सुरेन्द्र श्रेष्ठ, सरिता शाहीलिसें न्हून्हूपिं म्येहालामिपिनिगु सः दुथ्याःसा स्वय्म संगीतकार मनराजा नकःमिं नं थुगु म्येचाः दुने सः बियादीगु दु ।

 

Categorized in कला