nepal life

मतिना दिवसय् थःगु स्वँयात माया यायेत आग्रह

नेवा: अनलाइन न्युज | २०७४ फाल्गुण २, बुधबार १५:३२:३६

वायु प्रदुषणया विरुद्धय् मंकाः संकल्प कायेगु कुतःया लिसें न्ह्यानाच्वंगु छवाःयंकंया अभियान मास्कमाण्डुया थौं बुधवाः ‘मास्कमाण्डु मखु जिमित काठमाडौं माःगु दु’ धासें क्वचायेकूगु दु ।

भ्यालेन्टाइन डे (मतिना दिवस)या लसताय् ‘जिं जिगु स्वँयात माया याये’ धैगु मू नारा दूगु ज्याझ्वलय् द्वःछिसिबें अप्वः युवा, विद्यार्थी, सर्वसाधारणया सहभागिता दूगु खः ।

मास्कमाण्डु १ व २ लिपा वायुया गुणस्तरय् सुधारया नितिं छुं नीतिगत व्यवस्था जूसां नं वायु प्रदुषण व उकिया लिच्वः झन् विकराल जुजुं वंगुलिं सर्वसाधारणय् सचेतनाया नितिं मास्कमाण्डु ३ अभियानया ग्वसाः ग्वयागु स्वच्छ उर्जा नेपालया ज्याझ्वः प्रबन्धक राजन थापां धयादीगु दु ।

ज्याझ्वलय् माक्स बिना येँय् म्वायेत थाकूगु दु धासें रत्नपार्कया दथुइ लँपुइ सहभागीपिं लम्पसार जूगु खःसा ज्याझ्वःया हे छम्ह सहभागीयात प्रधानमन्त्रीया रुप कथं कयाः माक्सं दयेकातःगु स्वांमाः क्वखायेकूगु खः ।

मास्कमाण्डु ३ अभियानपाखें सहरया वायुया गुणस्तर सुधार यायेत व प्रत्येक व्यक्तिं थःगु स्वच्छ फय्या अधिकार सुनिश्चित यायेत थःथःगु स्तरपाखें जिम्मेवारी कायेत व दृढ जुयाः पलाः न्ह्याकेत इनाप याःगु दु ।

अभियान अन्तर्गत स्वनिगःया चावहिल, कोटेश्वर, सातदोबाटो, कलंकी, माइतीघरलिसेंया थीथी चोकय् स्वच्छ हावाया नितिं श्रृंखलाबद्ध सांकेतिक प्रदर्शन जूगु खः ।

Categorized in राष्ट्रिय