nepal life

मचा ब्वाज्या कासा क्वचाल

नेवा: अनलाइन न्युज – ललेन्द्र शाक्य | २०७४ कार्तिक २, बिहिबार १४:४२:२०

नेपाःया मौलिक संवत नेपाल संवत् ११३८ न्हूदँया लसताय् २१ क्वःगु मचा ब्वाज्या कासा क्वचाल ।

येँया भिन्द्यः त्वाः २० वडाय् च्वंगु न्हू पुचःया ग्वसालय् जूगु उगु मचा ब्वाज्या कासा लक्ष्मीपूजाया दिं थौं बिहिवाः सथय् ७ः३० ता इलय् येँया बसन्तपुरय् उगु मचा ब्वाज्या कासाया उलेज्या जूगु खः ।

उगु मचा ब्वाज्या कासाया उलेज्या नेवाः न्ह्यलुवाः मल्ल के. सुन्दरं रिबन चानाः यानादीगु खः । मचा ब्वाज्या कासा बसन्तपुरं ब्वां वनाः दफतर, ओमबहाः, यँगाः, लगं, ज्याबहाः, न्हूघः, क्वहिति जुयाः भिन्द्यःत्वालय् थ्यंकाः क्वचायेकूगु खः ।

कासाय् मिजं मस्तपाखें न्हाप लाःम्ह भिन्द्यः त्वाःया च्यादँ दुम्ह सागर लामा, ल्यू भिन्द्यः त्वाःयाम्ह हे ९ दँ दुम्ह कुश प्रताप सिं, लियांल्यू भिन्द्यः त्वाःयाम्ह हे ७ दँ दुम्ह अनुज चौधरी जुयादीगु खः ।

अथेहे, मिसा मस्तपाखें बसन्तपुरया ८ दँ दुम्ह मनिषा शाही, ल्यू ८ दँ दुम्ह लुमिला मानन्धर, लियांल्यू च्यादँ दुम्ह बोसिगांया निभा श्रेष्ठ जुयादीगु खः ।

कासा क्वचायेकाः भिन्द्यः त्वालय् न्हू पुचःया नायः मनरत्न शाक्यया नायःसुइ न्ह्याःगु समापन सभाय् मूपाहाँ भाजु मल्ल के. सुन्दरं कासा त्याःपिन्त दां सिरपाःलिसें मेडल व दसिपौ लःल्हानादीगु खः ।

न्हू पुचःया छ्याञ्जे नविन रंजितं न्ह्याकादीगु उगु सभाय् मचा ब्वाज्या कासायात ग्वाहालि यानादीपिं सकलसित मचा ब्वाज्या ज्याझ्वःया कजि विजय रंजितं सुभाय् बियादीगु खः ।

सभा क्वचायेकाः ब्वति काःपिं मस्तय्त लुखा सिरपाःया ज्याझ्वः नं याःगु खः ।

Categorized in कासा