नेवा: अनलाइन न्युज | २०७२ जेठ २९, शुक्रबार १४:२५:२७

माननीय मन्त्री ज्यू,
भुमिसुधार तथा व्यवस्थापन मन्त्रालय
सिंहदरवार, येँ ।

विषयः ध्यानाकर्षण याकागु बारे ।

वंगु बैशाख १२, १३ व २९ गते वंगु विनाशकारी तःभुखाय्या हुनिं देसय् तःधंगु जनधनया क्षति जूगु दु । आःतक भुखाचय् लानाः ८,६०० स्वयां अप्वःसिनं ज्यान त्वःफिकूगु दुसा २२,००० स्वयां अप्वः गंभीर घाःपाः जूगु दुसा अधिकांश विश्व सम्पदा सूचीकृत सांस्कृतिक सम्पदात व मेमेगु ऐतिहासिक व पुरातात्विक महत्वया देगः, बाहा, बहि, फल्चा, सतः, ल्वहंहितित ध्वस्त जूगु दु । लिच्छविकालीन, मल्लकालीन, ऐतिहासिक शहर बस्तीत ध्वस्त जुयाः लखौं मनूत विस्थापित जूवंगु दु । भुखाचं प्रभावित अधिकांश क्षेत्र नेवाःतय्गु आदि थातथलो जूगु हुनिं बहुसंख्यक नेवाःत भुखाचं प्रभावित व विस्थापित जूगु दु । थुगु महाविपत्तिपाखें पार कायेत व विश्व सम्पदा व ऐतिहासिक व पुरातात्विक महत्वया संरचनाया पुनःनिर्माण व पुलांगु ऐतिहासिक बस्तीतय्गु पुनःनिर्माण यायेत धैर्यतापूर्वक व संयमतालिसें थीथी क्षेत्र व समुदायया जनताया ब्वतियात सुनिश्चित यासें तत्काल योजनाबद्ध रुपय् क्वय् न्ह्यथनाकथं ज्या यायेत जिमिसं सरकारयाके जोडदार माग यानाच्वना ।
१) विश्वसम्पदाय् सुचिकृत लगायतया साँस्कृतिक सम्पदातय्गु पुनःनिर्माण यायेबलय् उकिया मौलिकता, ऐतिहासिकता व साँस्कृतिक पहिचानयात यथावत कायम यायेमा । पुनःर्निर्माण ज्याय् स्थानीय सम्बन्धीत समुदायया प्रतिनिधित्व व सहभागीता सुनिश्चित यायेमा । विश्व सम्पदाय् सुचिकृत सम्पदातय्गु पुनःनिर्माण यायेबलय् उगु क्षेत्र जःखःया छेँतय्त उचित मुआव्जा, क्षतिपुर्ति बियाः चिइकाः थप आकर्षक व व्यवस्थित यायेत माःकथंया पलाः ल्ह्वनेमा ।
२) २०२२ सालय् नापी छुट जूगु स्वनिगःया स्वबासी वस्तीतय्गु नापनक्सा यानाः जग्गा धनी पुर्जा बीगुपाखे माःकथंया पलाः ल्ह्वनेमा ।
३) स्वनिगःया अप्वः थाय् खोना, किपू, सक्व, ख्वप आदि स्वाबासी जनतापिसं आतक नं जग्गा धनीपुर्जा काये मखंनि । थुगु अवस्थाय् उकिया हुनिं सरकारपाखें बीगु राहत, क्षतिपुर्ति व आवास कर्जाय् विभेद मजुइमा ।

४) आतक नं द्वैत स्वामित्व जग्गात ल्यंदनि । तैनाथी गुथि, गुथि, निजि गुथि लगायत द्वैत स्वामित्वय् दुगु जग्गा न्यायोचित ढंगं इनेज्या यानाः (गुथिया संरक्षण जुइकथं) सम्बन्धित तःसिं व म्हय्यात छेँ दयेके छिंगु लकस दयेकेत सरकारपाखें माःकथं पलाः ल्ह्वनेमा ।
५) थीथी हुनिं नामसारी जुइ ल्यंगु छेँ, जग्गाया फयांफच्छि याकनं छानविन यानाः नामसारीया ज्या न्ह्याकेमा ।
६) ल्यं दनिगु दर्ता छुट जग्गात दर्ता चायेकाः दसिया लिधंसाय् सम्बन्धित मनूयात धनीपुर्जा उपलब्ध याकेमा ।
मिति २०७२ जेष्ठ १९ गते सम्माननीय प्रधानमन्त्री सुशील कोइरालाज्यू न्ह्यःने पेश यानागु नेवाः स्वायत्त राज्य मंकाः संघर्ष समितिया पाखें १६ बुँदे ध्यानाकर्षण पत्रपाखें सरकारया ध्यान आकर्षण याकागु खँ माननीय मन्त्रीज्यू समक्ष निवेदन याना ।
सुभाय् ।

मनरत्न शाक्य
अध्यक्ष
नेवाः स्वायत्त राज्य मंकाः संघर्ष समिति
ने.सं.११३५ तछलागा दशमी
२०७२ जेष्ठ २९