nepal life

भ्रष्टाचारया ग्यानापूगु संक्रमण

नेवा: अनलाइन न्युज – ललेन्द्र शाक्य | २०७४ भाद्र १६, शुक्रबार १५:२१:२०

सानुराजा शाक्य

नेपालय् अझ नं भ्रष्टाचार नियन्त्रणया नितिं नियामक निकायत सवल मजूगु, नियामक निकायया प्रमुखत ल्यइबलय् राजनीतिक दलया शीर्ष नेतातनापया बांलाःगु सम्बन्ध दुपिं जक ल्ययेगु व न्याय क्षेत्रय् नं राजनीतिक कोटाया लिधंसाय् न्यायाधीश नियुक्ती प्रक्रियाया भ्रष्टाचार विरुद्ध शून्य सहनशीलता धइगु दलतय् नारा मात्र नाराय् सिमिति जूगु खनेदत ।

भ्रष्टाचारया खँय् पिने वःगु खँ धइगु छता निताः ज्वयाःवःगु घटना जक जुइफु । सार्वजनिक मजूगु तःतःधंगु भ्रष्टाचार काण्ड यक्व ल्याखय् दइगु अनुमान यायेछिं । भ्रष्टाचार हाः सरकारी कर्मचारीया पिउन, सुब्बा, खरिदारं निसें शुरु जुयाः पाइलट, डाक्टरनिसें राजनीतिक दलया शीर्ष नेतात थ्यं धइगु खँय् शंकाः मदु । तर राजनीतिक दलया शीर्ष नेतातसें याइगु भ्रष्टाचारया छानवीन जुइफइगु अवस्थाय् नेपाः थौंकन्हे मदु । भ्रष्टाचार विरुद्ध दकलय् सशक्त भूमिका म्हितेमाःगु निकाय धइगु राजनीतिक दलया नेतात खः तर नेतात हे भ्रष्टाचारयात म्हुतुं शून्य सहनशीलता धाःसां व्यवहारय् भ्रष्टाचार नियन्त्रणय् नितिं कुतः याःगु न्यनेमदु बरु अःखतं भ्रष्टाचारया घटनाय् हे अप्रत्यक्ष संलग्न जूगु खँ बय् बय् जुयाच्वंगु जक न्यने दु ।

भ्रष्टाचार नं थौंकन्हे लाख दुई लाखय् मदु अरबौं तकाय् जुइगु संस्कार ब्वलंगु दु । करौडौं तका भ्रष्टाचार याःसां छगू निगू घटनाय् कारवाही जूसां कारवाही न्यून जक जूगुलिं भ्रष्टाचारीतय्त प्रोत्साहित जुलला धइगु आः तकया अभ्यासया लिधंसाय् धायेछिं । चीन, कोरिया, जापानय् भ्रष्टाचारय् जूगु कारवाही स्वयेबलय् नेपाःया भ्रष्टतय्त जुइगु कारवाही धइगु सम्मान बिउगु खःला धइथें च्वं । मखुसा भ्रष्टाचारय् संलग्न जूगु आरोपय् अदालतय् यंकीबलय् नेपालय् आरोपित अपराधीया ख्वाः न्हिलान्हिला वंगु टेलिभिजनय् खनेदइ तर चीन कोरिया स्वल धाःसा थुकथं आरोपित जूपिं थःगु ख्वाः क्यने मछालाः रुमालं त्वःपुया मिडियापाखें तापाक्क च्वनेत स्वइ ।

थ्व स्वदँ प्यदँ दथुइ तःधंगु भ्रष्टाचारया घटनाया रुपय् दकलय् न्हापां एनसेल मिउगु घटनाय् सरकारयात पुलेमाःगु पुँजीगत लाभकर करीव ३५÷३६ अरवया भ्रष्टाचारया घटना सावर्जनिक जुल । थुकथं न्याये मियेगु ज्यायात सरकारया थीथी तहलं अःपुक स्वीकृत जूगु खँय् राजनीतिक तहनिसें सरकारी निकायया क्वय्या तहतक मिलीभगतम जुइकं संभव मजू धइगु खँ वल । तर थ्व घटनाय् सु सु दोषी खः धकाः कारवाही यायेगु ज्या मजू । खँ सावर्जनिक जुइवं दकलय् न्हापां छुं भचा लाभकर धकाः एनसेलं पुलाबिल । अय्नं थ्व घटना सामसुम मजुइवं एनसेलं थुलीतक जक पुले फइ धकाः मेगु छुं भचा कर पुल धइगु खँ वल । थ्वया दथुइ एनसेल लाभकरय् जूगु भ्रष्टाचारया घटना स्वयां नं तःधंगु घटनाया रुपय् कर फछ्र्यौट आयोगया नामय् अरबौं भ्रष्टाचार यात धाःगु खँ सावर्जनिक जुइवं एनसेल लाभकर भ्रष्टाचार काण्डया बारे चर्चा म्हो जुयावंगु दु ।

थुकथं हे कर फछ्र्यौट आयोगं याःगु अरबौं तकया भ्रष्टाचारया घटना दोषी आरोपित निम्हेसित अध्यक्ष लुमध्वज महत व सदस्य उमेश ढकाल अझं फरार सूची हे दुसा सदस्य सचिव जुया भ्रष्टाचार यायेगु ज्या अहम् भूमिका म्हितूम्ह आन्तरिक राजस्व कार्यालयया निलम्बित महानिर्देशक चुडामणी शर्मायात सर्वोच्च अदालतं थुना मुक्त यायेत आदेश बिउगु खः । भ्रष्टाचारया हे मामिलाय् न्यायपालिका व सेनाय् जुइगु भ्रष्टाचार दकलय् अप्वः ग्यानापू । नकतिनि अवकाश काःम्ह प्रधानन्यायाधीश सुशीला कार्की न्याय क्षेत्रय् खुल्लमखुल्ला भ्रष्टाचार जुयाच्वंगु खँ सावर्जनिक रुपं हे न्ववाःगु दु । तर न्याय क्षेत्रय् जुइगु भ्रष्टाचारयात पनेगु बल्लाःगु सयन्त्र मदु । अखतं भतिचा साहसिक बांलाःगु ज्या याइपिं प्रधानन्यायाधीश व न्यायाधीसया हुर्मत कायेगु कथं राजनीतिक नेतृत्वं संसदय् महाअभियोगया प्रस्ताव हयाः न्याय क्षेत्रयात भ्रष्टाचार यानाः थः नं नः राजनीतिक दल, उच्च पदस्थ कर्मचारीयात नकी धइगु सन्देश बिइत स्वःगु खनेदु । कांग्रेसया अध्यक्ष शेरबहादुर देउवा व पुष्पकमल दाहाल प्रधानमन्त्री जुयाच्वंगु इलय् निम्ह मिले जुयाः प्रधान न्यायाधीश सुशीला कार्कीया हुर्मत कायेगु कथं थःगु स्वार्थ पुरा मयाःगु लिधंसाय् महाभियोग हःगु घटना यक्व पुलां मजूनि । थुज्वःपिं नेतातय्गुपाखें नेपालय् भ्रष्टाचार म्हो यायेत योगदान जुइधकाः आशा याये थाय् मदु ।

कर फछ्र्यौट आयोगया नामं जूगु १० अरबया भ्रष्टाचार काण्ड धुंकाः थौंकन्हे आयल निगमं जग्गा खरीद प्रकरणय् याःगु अरबौं तकाया भ्रष्टाचारया घटनाया चर्चा अप्वः दु । गुकिं यानाः पुलांगु भ्रष्टाचारया घटनाया चर्चा म्हो जुयाः ल्वमना वनीगु जकं खःला धइगु नियती विश्वास याये माःगु अवस्था दु । आयल निगमया कार्यकारी निर्देशक लगायत उच्च पदस्थ कर्मचारीतय् संलग्नताय् चलनचल्तीया मुल्य स्वयां थिकेक जग्गा न्यानाः अरबौं तकाः घोटला याःगु खँ प्रष्ट जुयाः नं थ्व घोटाला प्रकरणय् संलग्न जूपिन्त कारवाही याये फयाच्वंगु मदु । धात्थेंया जग्गा थुवाः नं धाःसा म्हो जक ध्यबाः दइगु तर धात्थेंया जग्गा थुवाः नं जग्गा मिउगु कन्हे हे जग्गा न्याम्ह न्हूम्ह जग्गा थुवाः नं आयल निगमयात चलनचल्ती स्वयां प्यदुगं न्यादुगं अप्वः ध्यबा कयाः आयल निगमयात जग्गा मिउगु घटना अःपुक सी दु कि अन भ्वं मिले यानाः उच्च पदस्थ कर्मचारीत जानाः तःधंकः भ्रष्टाचार यात ।

आयल निगमया जग्गा खरीद प्रकरणय् जूगु भ्रष्टाचारया घटना लिपा नेपाल मेडिकल कलेजयात सम्बन्धन बिउगु घटनाय् चरम भ्रष्टाचार जुयाःजक संभव जूगु खँ पिनेवःगु दु । नेपाल मेडिकल कलेजयात सम्बन्धया सवालय् नं मेडिकल काउन्सिलया निरक्षकत वइगु इलय् खः थें च्वंक निरक्षकत वइगु नितिं जक ज्या याइपिं डक्टर, मेडिकल इक्विपमेन्टत व नक्कली विरामी क्यना नं सम्बन्धन कायेत ताःलाःगु खँ पिहाँवःगु दु । भ्वं जकमिले यानाः मखुकि छेँ, डक्टर, नक्कली विरामी, न्यये कयाहःगु सामान क्यनाः सम्बन्धन कायेगु ज्या सेटिङ मजुइक न संभव हे मदु । सेटिङ यानाः भ्रष्टाचारया चरम नमूनाकथं नेपाल मेडिकल कलेजया सम्बन्धन उदाहरण जूगु दु । एनसेल प्रकरण, कर फर्छौट प्रकरण, आयल निगमया जग्गा खरीद प्रकरण, नेपाल मेडिकल कलेजयात बिउगु सम्बन्धनया भ्रष्टाचारया प्रकरणत फुक्क न्हापाया सेटिङ यानाःजक संभव जूगु भ्रष्टाचारया घटना खः ।

थुज्वःगु भ्रष्टाचारया घटनायात कारवाही यायेत सरकार, अख्तियार जक मखुकि राजनीतिक दलया शीर्ष नेतात अले न्यायालयतकं उत्साहित मजूगु खनेदु । थुकथं स्वयेबलय् नेपाःया दुर्गतिया छगू बाधक भ्रष्टाचार न्हंकेत तःधंगु हे आन्दोलनया माग यानाच्वंगु खनेदु । तर नेपालय् भ्रष्टाचार महंगीया विरुद्ध सशक्त आन्दोलनया विकास जूगु धाःसा खनेमदु । छगू तःधंगु भ्रष्टाचारया घटना धुंकाः सावर्जनिगु जुइगु मेगु तःधंगु भ्रष्टाचारया घटनां पुलांगु भ्रष्टाचारया घटना ल्वःमना वनीगु ल्वय् नं भ्रष्टाचारया विरुद्ध घातक हे खः ।

Categorized in बिचा: