nepal life

भुटानयात नं बुकल नेपालं, बिहिवाः सिंगापुरलिसे धेंधेंबल्ला

नेवा: अनलाइन न्युज | २०७४ भाद्र २८, बुधबार ११:१०:२२

मलेसियाय् जुयाच्वंगु एसीसी यू–१९ पूर्व क्षेत्रीय क्रिकेट ल्यज्या कासाय् नेपालं थःगु निक्वःगु कासाय् शानदार जित हासिल याःगु दु ।

बुधवाः सुथय् किनरारा ओभल मैदानय् जूगु कासाय् नेपालं कप्तान दीपेन्द्र सिंह ऐरीया ५ विकेटया ग्वाहालिइ भुटानयात ५० रनय् हे कःघासें अःपुक हे त्याकूगु खः । नेपालं काःगु ५१ रनया चीधंगु लक्ष्य १ विकेटया नोक्सानीइ ८ ओभर ३ बलय् पूवंकूसें ९ विकेटं त्याकूगु खः ।

टस त्याकाः न्हापां ब्याटिङ याःगु भुटानं २८ ओभरय् फुक्क विकेट गुमेयानाः मुक्कं ५० रन मुंकूगु खः । भुटानया पाखें उगेन दोर्जी १३ व तासी फुन्सो १६ ल्याखं जक दोहोरो ल्याः मुंकूगु खः ।

नेपाःया नितिं आक्रामक बलर सन्दिप लामिछानें ७ ओभर बलिङ यासें ७ रन खर्चेयानाः ४ विकेट काःगु खःसा कप्तान दीपेन्द्रं ८ ओभर बलिङ यासें ३३ रन बियाः ५ विकेट काःगु खः । अथेहे नन्दन यादवं १ विकेट काःगु खः ।

नेपालं बिहिवाः मलेसियाया क्लब अमानय् सिंगापुरलिसे धेंधेंबल्ला याइगु जूगु दु । नेपालं थ्वसिबें न्ह्यः सोमवाः सुथय् थाइल्याण्डयात २५५ रनया विशाल अन्तरं त्याकूगु खः । निगू कासा म्हितूगु नेपालं निगुलिं कासाय् विशाल अन्तरं त्याकूगु खः ।

Categorized in कासा