nepal life

भारत व श्रीलंकाय् वःगु शक्तिशाली आँधीपाखें १६ म्ह सित, १०० म्ह बेपत्ता

नेवा: अनलाइन न्युज | २०७४ मङ्सिर १५, शुक्रबार १६:५०:५३

भारत व श्रीलंकाय् बिहिवाः चान्हय् निसें शुक्रवाः सुथय् तक वःगु शक्तिशाली आँधी (धाकुफय्)या हुनिं कम्ती नं १६ म्ह मनूत सीगु दुसा उगु आँधीपाखें मेपिं १०० म्ह मल्याक मनूत बेपत्ता जूगु दु ।

उगु आँधीया हुनिं उगु निगुलिं देसय् सलंसः सिमाः क्वःदःगु दुसा विद्युतीय लाइनत अवरुद्ध जूगु अधिकारीपिन्सं जानकारी ब्यूगु दु ।

आँधीपाखें लँपु लिक्कया छेँत दुनावःगु व पुइकूगु धाःगु दु । आँधी प्रभावित क्षेत्रय् लखौं मनूतय्त उगु क्षेत्र खतरायुक्त जूगु ख्याच्वः ब्यूगु दु ।

भारतया दक्षिणी भू–भाग तामिल नाडू व केरला प्रान्त अप्वः प्रभावित जूगु दुसा श्रीलंकाया दक्षिणी व मध्य प्रान्ततय्के क्षति जूगु दु ।

उगु क्षेत्रया फुक्क स्कूल निन्हु न्ह्यः निसें बन्द जूगु दु । सतक, रेलमार्ग तकं बन्द जूगु प्रकोप व्यवस्थापन केन्द्रं जानकारी ब्यूगु दु ।

प्रकोप नियन्त्रण अधिकारीया कथं आँधीया हुनिं भारतय् गुम्ह व श्रीलंकाय् न्हय्म्ह मनूया ज्यान वंगु दु । प्रायः मनूत सिमा क्वःदयाः ल्हाना व उगु सिमां किचे जुयाः सीगु धाःगु दु ।

ockhi

उगु आँधीया हुनिं तटीय क्षेत्रया समुद्रय् न्याँ लाइगु नाचात तकं फुक्क पुइकाः यंकूगु भारतया रक्षामन्त्री निर्मला सिथारमानं धयादीगु दु ।

तनाच्वंपिं आपालं नागरिकपिं न्याँ लायेत समुद्रय् वंपिं खः । इपिं अप्वः धयाथें व्यवसायिक मछुवा जूगु धाःगु दु ।

शुक्रवाः सुथय् पाखे उगु आँधीया लिच्वः आपालं खनेदूगु खः । बिहिवाः बहनीनिसें हे व्यापक फय् वःगु व लिपा तच्वकं वा वःगुलिं यानाः आपालं ल्याखय् नागरिक हताहत व बेपत्ता जूगु बुखँय् धयातःगु दु ।

Categorized in अन्तर्राष्ट्रिय