nepal life

भाद्र २९ निसें असोज २ तक न्यान्हु सार्वजनिक विदा

नेवा: अनलाइन न्युज | २०७४ भाद्र २७, मंगलबार १०:१०:२६

सरकारं स्थानीय तहया स्वंगूगु चरणण निर्वाचनय् न्यान्हु सार्वजनिक विदा बिइगु निर्णय याःगु दु । सोमवाः च्वंगु मन्त्रिपरिषदया बैठकं भाद्र २९ निसें असोज २ गतेतक सार्वजनिक विदा बिइगु निर्णय याःगु खः ।

निर्वाचन आयोगं थ्वसिबें न्ह्यः निर्वाचन जुइगु प्रदेशय् न्यान्हु बिदा बिइत सरकारयाके इनाप याःकथं सरकारं बिदा बिइगु निर्णययाःगु संचारमन्त्री मोहनबहादुर बस्नेतं जानकारी बियादीगु दु ।

अथेहे बैठकं प्रधानमन्त्री शेरबहादुर देउवाया आर्थिक सल्लाहकारय् ज्ञानचन्द्र आचार्य नियुक्त नियुक्त याःगु दु । बैठकं बागमती सभ्यता एकीकृत विकास समितिया कार्यकारी समितिया नायः पदय् नरेन्द्रराज बस्नेतयात नियुक्त याःगु दु ।

अथेहे, मन्त्रिपरिषद बैठकं भुखाय् लिपाया पुनःनिर्माणया नितिं विश्व बैंकं दाताया मंकाः कोषपाखें उपलब्ध याकूगु १ अर्ब ५ करोड तका दां स्वीकार यायेगु निर्णय याःगु सरकारया प्रवक्ता व सूचना व संचारमन्त्री मोहनबहादुर बस्नेतं जानकारी बियादीगु दु ।

Categorized in राष्ट्रिय