nepal life

भाद्र २८ निसें कीर्तिपुर दशैं महोत्वस न्ह्याइगु

नेवा: अनलाइन न्युज – ललेन्द्र शाक्य | २०७४ भाद्र २६, सोमबार १३:३८:३९

किपूया संस्कृति व परम्परागत ब्वज्या जुइगु

मोहन व स्वन्ति नखःया लसताय् स्वक्वःगु कीर्तिपुर दशैं महोत्सव–२०७४ किपुली न्ह्याइगु जूगु दु ।
वइगु भाद्र २८ गतेनिसें असोज ९ गतेतक न्ह्याइगु उगु कीर्तिपुर दशैं महोत्सव किपूया १० वडा न्हूबजारय् च्वंगु बसपार्क फुटबल मैदानय् जुइगु जूगु दुसा उगु महोत्सव न्हिथं सुथय् १० ता ईनिसें सनिलया ७ ता ईतक न्ह्याइगु जूगु दु ।

राईज म्यूजिक प्रा.लि. व औद्योगिक शान्ति नेपाल संस्थाया ग्वसालय् जुइगु उगु महोत्सवय् आकर्षणया रुपं थीथी सांस्कृतिक ज्याझ्वःया लिसें किपूया संस्कृति व परम्परागत ब्वज्यात नं जुइगु जानकारी ब्यूगु दु ।

अथेहे मेगु आकर्षण कथं ज्येष्ठ नागरिक सम्मान ज्याझ्वः, मनोरञ्जनात्मक कासात, परम्परागत नेवाः नसाज्वलं, हास्य कलाकारपिनिगु ब्वज्या, बाल मनोरञ्जनया हलंज्वलंत, राष्ट्रिय स्तरया कलाकारपिनिगु ब्वज्या, राष्ट्रिय स्तरया संगीतकःमिपिनिगु ब्वज्या, खुल्ला हुलाप्याखं व गायन धेंधेंबल्ला कासाया लिसें वसः, बसाः ज्वलंया लिसें हस्तकलाया हलंज्वलंया ब्वज्या व मिइगु ज्या जुइगु जानकारी ब्यूगु दु ।

उगु स्वक्वःगु कीर्तिपुर दशैं महोत्सव–२०७४ ज्याझ्वः नयाँ बजार क्लब, राजकमल महर्जन, शशीर महर्जन, बाघभैरव टेलिभिजन, तेजस्वी कला केन्द्र–न्हूबजाः, अमीर कला केन्द्र–भृकुटीमण्डपया विशेष ग्वाहालिं जुइत्यंगु खः ।

थुगु महोत्सवया नितिं किपूया २ वडा द्यःध्वाखाय् च्वंगु माःक्वाःचा गार्डेन, वेभ, सीएनएनई न्यूज डट कम, नेपाल पर्यटन बोर्ड, सिताराम दूध ग्वाहालिमि जूगु दुसा अफिसियल ब्याण्ड कथं द रोयल्स ब्याण्ड च्वंगु दु ।

थुगु महोत्सव दँय् दसं न्ह्यानाच्वंगु खःसा थ्वयां न्हापाया न्हापांगु व निक्वःगु महोत्सव नं तःजिक न्यायेकाः सुथांलाक्क क्वचायेकूगु खः ।

ग्वसाः खलकं उगु महोत्सवय् सकलसित ब्वति कायेत इनाप याःगु दु ।

Categorized in स्थानिय-समाज