nepal life

भाइरल ज्वरों ९ म्ह सित जाजरकोटय्

नेवा: अनलाइन न्युज | २०७४ पौष २३, आइतबार १०:२२:१७

जाजरकोटय् छवाः न्ह्यःनिसें ब्वलंगु भाइरल ज्वरो व स्यखं(रुघाखोकी)या हुनिं च्याला दुम्ह ह्याउँमचालिसें ९ म्ह मनूया ज्यान वंगु दु ।

ज्वरो व रुघाखोकीया हुनिं जुनीचाँदे गाउँपालिकाय् ३०० म्ह सिबें अप्वः गांबासीपिं विरामी जूगु स्वास्थ्य चौक बड्कुलेया इञ्चार्ज हरिबहादुर सिंहं धाःगु दु ।

सिंहं न्हिथं स्वास्थ्य चौकीइ वासः यायेगु नितिं वइपिं थ्यंमथ्यं ६० निसें ७० म्ह भाइरल विरामी हे वइगु यानाच्वंगु धाःगु दु ।

ज्वरो व रुघाखोकीया हुनिं जुनीचाँदे गाउँपालिका २ मजरकोटया ६५ दँया धनसरा नाथ, ५७ दँया आइती तिरुवा, चुनीचाँदे गाउँपालिका ३ या ६७ दँया करसिंह टमाटा, ७५ दँया सतरुप शाही व ५ म्ह ह्याउँमचातय्गु ज्यान वंगु दु । सीपिं मचातय्के लच्छि दुपिं निम्ह, च्यान्हु दुपिं निम्ह व प्यदँया छम्ह लाःगु खः ।

जिल्ला सदरमुकाम खलंगापाखें थ्यंमथ्यं निन्हु न्यासी वनेमाःगु दुरीइ लाःगु जुनीचाँदे गाउँपालिकाय् मौसम हिलाबुलाया लिसें अतिकं चिकूगु अप्वःगु हुनिं भाइरल प्रकोप ब्वलंगु इञ्चार्ज सिंहया धापू खः । शुरुइ जुनीचाँदे गाउपालिका १, २ व ३ नम्बर वडाय् ब्वलंगु भाइरल ज्वरो व रुघाखोकी नियन्त्रणय् मवःबलय् मुक्कं गाउँपालिकाय् हे ब्वलंगु खः ।

जिल्ला स्वास्थय ज्याकुथि जाजरकोटपाखें ल्वय् पहिचानया नितिं स्रोत व्यक्ति व ल्याब टेक्निसियन कृष्ण खत्रीलिसें डाक्टरपिनिगु पुचः घटना स्थलय् छ्वयागु जिल्ला स्वास्थ्य प्रमुख रामबहादुर नेपालीं धाःगु दु ।

Categorized in दुर्घटना-अपराध