nepal life

भाइबर व फेसबुकय् नक्कली चिठ्ठा आतंक

नेवा: अनलाइन न्युज | २०७४ मङ्सिर २, शनिबार ०९:३०:५४

प्रलोभनय् मलायेत सर्वसाधारणयात प्रहरीया आग्रह

थुगु वाः न्ह्यः झापाया छम्ह मिसाया फेसबुकय् लण्डनपाखें म्यासेज वल, ‘छिगु प्रोफाइल स्वयाः जि अतिकं प्रभावित जुया । मतिनाया चिं कथं छुं सामान व उकी दुने नगद नं छ्वयाहयागु दु । कायेगु ल्वःमंकादीमते’
लुइस स्टेफन नांया आईडीपाखें उगु म्यासेज वःगु खः ।

उम्ह मनुखं कुरियर छ्वयाहयेगु ठेगाना फ्वन । उकिया छन्हु लिपा हाकनं म्यासेज वल, ‘जिं कुरियर यानागु दु, अन निन्हुया दुने थ्यनी ।’

उकिया कन्हय् कुन्हु कुरियर याःगु सामान व रसिदया किपाः तकं वल । ‘व खनेधुंकाः पत्याः मयायेगु खँ हे मजुल ।’ उम्ह मिसांधाःगु दु, “तर, स्वन्हु दयेधुंकाः नं सामान नेपाल मथ्यन ।”

मेगु दिं सुथय् हे भारतीय नम्बरपाखें फोन वल । फोनय् न्वःवाःम्ह मिजं नं हिन्दी भासां धाल, “छिगु सामान नयाँदिल्लीइ थ्यनेधुंकूगु दु । थनं नेपाः छ्वयाहयेबलय् ५०,००० तका दां खर्च जुइ । व रकम छ्वयाहये धुंकाः छिसं सामान कायेखनी ।”

दिल्लीपाखें फोन वयेखतं हे उम्ह मिसायात न्हापा हे शंका जुइधुंकूगु जुयाच्वन । अथेहेतुं दां माग जुइधुंकाः उम्ह मिसा अजू चाल । निन्हुतक छुं लिच्वः मबिल ।

“जिं सामान छ्वयाहयागु खः । छिं आःतक नं कयामदीनिगु जुयाच्वन ।” हाकनं उम्ह विदेशी नागरिकं म्यासेज यात ।

लिसलय् उम्ह मिसां थःके  ५०,००० तका मदूगु व व रकम आईमईपाखें छ्वयाहये धुंकाः जक थःम्ह सामान कायेखनीगु जानकारी बिल । वधुंकाः छुं रिप्लाई मवल ।

येँया बानेश्वरय् च्वनाः वयाच्वंम्ह छम्ह विद्यार्थीयात भाइबरय् २५ लख तका दां लाःगु सन्देश वल । च्वयातःगु खः, ‘हेल्लो ! कस्टमर केयर से बात कर रहाँ हुँ, आपके नम्बर पर लटरी लगा हे, २५ लाख के ।’

व मनू अजू चाल, भाइबरय् सुं मनूया नम्बरपाखें २५ लख तका दांया चिठ्ठा लाःगु म्यासेज वयेधुंकाः । तर, वं सामाजिक संजालय् थथे थीथी व्यक्तिं थगी यानाच्वंगु खबर ब्वनातये धुंकूगु खः । उकिं वं व म्यासेजया छुं लिसः मछ्वल ।

थथे वइ चिठ्ठा लाःगु सन्देश !

लिपांगु इलय् सामाजिक संजालतपाखें चिठ्ठा लाःगु धासें ठगी यायेगु क्रम अप्वयाच्वंगु दु । प्रायः विदेशी व्यक्ति व थीथी देसया नम्बरपाखें वइगु सन्देशय् न्हापां चिठ्ठा लाःगु धाइ ।

वधुंकाः उगु रकम प्राप्त यायेत न्हापां निह्चित रकम छ्वयाहिं धकाः धाइ । व रकम छ्वयाहये धुंकाः चिठ्ठा लाःगु सुचं ब्यूम्ह प्रयोगकर्ता थः हे सम्पर्क पिने वनी ।

चिठ्ठा लाःगु धासें ठगी यायेगु झ्वलय् न्हापां पश्चिम देसय् व्यापक जूगु खः । व क्रम छुं ई थुखे नेपालय् नं न्ह्याःगु जानकारपिन्सं धाःगु दु ।

केन्द्रीय अनुसन्धान ब्युरो (सीआईबी) प्रमुख डिआईज्ी पुष्कर कार्कीं धयादी, “थःम्हं न्याहे मन्याःसे चिठ्ठा लात धकाःसर्वसाधारणं पत्याः यायेगु नं गलत खः । थुकी सर्वसाधारण थः हे नं सचेत जुइमाः ।”

सीआईबीं चिठ्ठा लाःगु नक्कली सन्देश सर्वसाधारणयात वयेधुंकाः सचेतनाया नितिं छगू सन्देश हे जारी याःगु दु ।

सन्देशय् धयातःगु दु, ‘विदेशी नम्बर व म्यासेन्जरपाखें उज्वःगु प्रकृतिया सन्देश वल धाःसा लिक्कच्वंगु प्रहरी ज्याकुथि बाय् अपराध अनुसन्धान महाशाखाय् उजुरी बिइत इनाप यानाच्वना ।’

प्रहरीं गनं उज्वःगु कथंया सन्देश वयाच्वंगु खः धैगु बारे अनुसन्धान न्ह्याकूगु दु ।

Categorized in अन्तर्राष्ट्रिय