nepal life

बौद्ध सम्पदाय् अन्तर्राष्ट्रिय पुरातत्वविदपिन्त स्थलगत भ्रमण

नेवा: अनलाइन न्युज | २०७४ फाल्गुण १, मंगलबार ११:१०:४०

कपिलवस्तु व उगु क्षेत्रया जःखः च्वंगु बौद्ध सम्पदाया ऐतिहासिक तथ्यया अनुसन्धान यायेत अन्तर्राष्ट्रिय पुरातत्वविदपिन्त स्थलगत भ्रमण व अध्ययन याकूगु दु ।

विज्ञपिनिगु मंकाः पुचःयात मंगलवाः स्थानीय सगरहवा, निक्लिहवा, अरौराकोट व लुम्बिनीया पुरातात्विक स्थल चाःहीकूगु खः । पुरातत्व विभाग, बेलायतया दुरहाम विश्वविद्यालय व लुम्बिनी विकास कोषया ग्वसालय् उगु क्षेत्रया पुरातात्विक महत्व विज्ञपिन्त जानकारी ब्यूगु खः ।

उगु क्षेत्रय् उत्खननया नितिं अन्वेषण यायेत बंगलादेश, श्रीलंका, पाकिस्तान, बेलायत व इटलीया यानाः १३ म्हया विज्ञ पुचः वंगु महिनाय् नेपाः वःगु खः ।

भूभौतिक सर्भेक्षणपाखें पुरातात्विकस्थल जःखःया जमिनया सतह दुनेया अवस्था थुइकेत व न्हूगु तथ्य लुइकेत माःगु उपायया अवलम्बन यायेफइ ।

विभागया प्रवक्ता रामबहादुर कुँवरं युनेस्को जापानीज फण्ड इन ट्रष्टया आर्थिक ग्वाहालिइ छुं दँ न्ह्यःनिसें तिलौराकोटय् जुयाच्वंगु उत्खनन ज्यां उगु थासय् इसापूर्व ८०० दँ पुलांगु मानव सभ्यता दूगु प्रमाण प्राप्त जूगु जानकारी बियादीगु दु ।

उत्खननपाखें लूगु थीथी पुरातात्विक हलंज्वलंया वैज्ञानिक परीक्षण लिपा विभागं उगु तथ्य पिने हःगु खः ।

Categorized in राष्ट्रिय