nepal life

बोलबम धर्मया नामय् सांस्कृतिक अतिक्रमण

नेवा: अनलाइन न्युज | २०७४ श्रावण २५, बुधबार १३:३२:११

बिजयकृष्ण
झीगु धर्म संस्कृति परम्पराय् स्वयेगु खत धाःसा तीर्थस्थलय् नं थीथी तीर्थस्थलया थीथी कथंया महत्व दु । कायाष्टमी खुन्हु कागेश्वरी महाद्यः (आलापोट गाविस)या थाय् वनेगु, नवरात्रीबलय् थीथी शक्तिपीठय् दर्शन यायेगु, तःधं एकादशिबलय् प्यम्ह नारांद्यः सीकः वनेगु, यँद्याःबलय् यंकीदहः वनेगु, बालाचः¥हे बलय् बाला ऊ वनेगु, सिलाचः¥हेबलय् महाद्यःयाथाय् मि च्याकाः च्वनेगु इत्यादि । छगू छगू थाय्या छगू छगू महात्म्य नं दुगु झीसं न्यना च्वनागु खँ जुल ।
थथेहे खास छगू परम्परायात स्वीकार यानाः उगु हे मार्गय् जुइपिं ला झन् हे पूर्वनिर्धारित व निर्देशित परम्पराकथं हे लगे जुइ । गथेकि थुखेपाखेया धामी झाँक्री जुयाच्वंपिं धाक्व गुंपुन्हीबलय् सिलुतीर्थय् वनी । पश्चिमपाखेया धामीझाँ क्रीत मानसरोवरय् थ्यंक वनी । थुकथं हे जूगुलिं थीथी इलय् थीथी देवस्थलय् मेला लगे जुइगु परम्परा नं दयाच्वंगु दु ।
श्रावण मासय् भारतया झारखण्ड राज्यय् च्वंगु देवधर शहर सत्तीक च्वंगु वैद्यनाथधाम (बाबाधाम)य् मेला लगे जुइ । इलाहबाद सत्तीक च्वंगु छगू थासय् च्वंगु गंगा खुसिं लः लोटाय् कयाः गनं हे मदीकुसें १०५ किलोमिटरया पैदलयात्रा तय यानाः बाबाधामय् जल हायेकीगु खः । थुगु यात्राय् थुकथंया कष्टकर यात्रा याइगुया फल छु दु वा मदु धइगु ला धार्मिक आस्था दुनेया फील्डया हे खँ जुल । तर उकिया महात्म्य थःगुकथं हे दइगु स्वाभाविक खः ।
थन थ्व चर्चा यानागुया अर्थ बोलबम यात्रा थन यायेगु धइगु धार्मिक मान्यताकथं पाय्छि खः कि मखु धइगु विवेचना खः । धार्मिक मान्यता व विश्वासया स्टाण्डर्ड हे कथं स्वयेबलय् नं बाबाधामया यात्रा बाबाधाम यात्रा हे जक जुइ, थन सुन्दरीजलं लः हयाः पशुपतिइ छायेवं तुं जुइमखु धइगु खँ स्पष्ट हे सीका कायेफु ।
तर थन प्रचलन मदुगु प्रचलन थन हयाः सुनां याकल ? थ्व नक्कल जक खः कि सांस्कृतिक अतिक्रमण नं खः ? स्पष्टतः थ्व सांस्कृतिक अतिक्रमण हे खः, छाय्धाःसा थुकी न्हापां आयोजकतसें उकथंया आयोजना उद्देश्यमूलक पहलं याःगु खः ।
धार्मिक क्षेत्र दुने नं आपालं मतमतान्तर, सिद्धान्त व पन्थत दु । गुलि चित्त शुद्ध याये धाःपिं चित्त शुद्ध यानाः छेँय् हे च्वनेगु व चित्त शुद्ध जुइकेगु नितिं अनेक अभ्यास याइपिं दु । पुलांगु परम्परागत मान्यताकथं द्यः पुज्याइपिसं चथाबलय् चथास्वां हे तयाः पुज्याइ, सत्यनारायण द्यःया धलं दन धाःसा अपुंगो हे छाइ । अर्थात् निश्चित विधि नाला काइ । न्हाय्पं स्याःसा न्हाय्पंस्याः द्यःयाथाय् हे वनी, मस्तय्सं इलय् खँ मल्हात धाःसा सूर्यविनायक हे वनी ।
थ्व सकतां विचाः यायेबलय् बाबाधामय् बोलबम यात्रा यायेगु धइगु केदारनाथधाम व काशीया विश्वनाथ द्यः वनेगु मखु । द्यःला महाद्यः हे खः ।
थुगु हिसाबं नं नेपाःया थीथी महाद्यः दुथाय् बोलबम धकाः यात्रा यानाः जात्रा न्यायेकेगु ज्या सांस्कृतिक अतिक्रमण हे खः ।

Categorized in बिचा: