nepal life

बेलायतय् पृथ्वी परिक्रमा अवार्डया तयारी यासें सुरेन्द्र प्रसाद श्रेष्ठ

नेवा: अनलाइन न्युज – विजयरत्न | २०७४ मङ्सिर १५, शुक्रबार १४:२२:०१

‘छगू युगय् छक्वः’या नारालिसें बेलायतय् नं पृथ्वी परिक्रमा अवार्डया ग्वसाः ग्वइगु जूगु दु । वइगु डिसेम्बर थुगु अवार्डया बेलायतया संस्करणया ग्वसाः ग्वयेगु भाला कुबियादीम्ह समाजसेवी व व्यापारी सुरेन्द्र प्रसाद श्रेष्ठं बेलायत संस्करण तःजिक व सभ्य जुइगु धयादीगु दु ।

आः थुकिया व्यापक तयारीइ थःगु पुचलं पलाः न्ह्याकाच्वंगु जानकारी भाजु सुरेन्द्र बियादीगु दु । रामबहादुर सुवेदी अवार्डया हलंज्वलंलिसें बेलायत थ्यनेधुंकाः बेलयतय् अवार्डया चर्चा परिचर्चा झन हे अप्वःगु बेलायत ग्वसाः ग्वयादीम्ह सुरेन्द्रं धयादीगु दु ।

सोमवाः जक त्रिभुवन अन्तर्राष्ट्रिय विमानस्थलय् दोलखा ग्रुपं छगू तःजिक ज्याझ्वःया ग्वसाः ग्वयाः गिनिज बुक अफ वर्ल्ड रेकर्डय् नां च्वकेत ताःलाःम्ह रामबहादुर सुवेदीया पृथ्वी परिक्रमा अवार्ड अन्तर्गत युरोप भ्रमण सुथां लायेमा धकाः भिंतुना देछाःगु खः । पृथ्वी परिक्रमा अन्तर्गत मंगलवाःनिसें बेलायत जुयाः वेल्स, स्कटल्याण्ड व वेल्जियम वनेत्यंम्ह सुवेदीयात छगू ज्याझ्वःया दथुइ बिदाइ याःगु खः ।

ज्याझ्वलय् सुवेदीलिसें नेपाली संकिपा क्षेत्रय् विगत निगू दशकनिसें पलाः तयादीपिं थीथी संकिपाकःमिपिन्त नं हनेगु ज्या याःगु खः ।

दोलखा ग्रुपया मूछ्याञ्जे कुमार जिरेलं डेढ दर्जनसिबें अप्वः नांजाःपिं कलाकारपिन्त विश्वया हे न्हापांगुखुसि ब्वयाच्वंगु जहाज दुने, समुद्र क्वय्, समुद्र च्वय् व विश्वया हे सर्वोच्च शिखर सगरमाथाया आधार शिविरय् नेपाली संकिपाया अवार्ड ग्वसाः ग्वयाः विश्व कीर्तिमान तयाः दोलखा जिल्लाया गौरव जूम्ह सुवेदीया यात्राया सफलताया कामना याःगु खः ।

ज्याझ्वलय् नांजाःपिं कलाकार व संकिपाकःमिपिन्त पुलांम्ह व अनुभवी निर्देशक ज्ञानेन्द्र देउजा, म्येच्वमि व नेपाल बैंकया नोट डिजाइनर सुन्दर श्रेष्ठ, नांजाःम्ह निर्माता बसन्तकुमार श्रेष्ठपिन्सं संकिपा सम्पादक तारा थापा किम्भे, संकिपा सम्पादक नविन निरौला, संकिपा निर्देशक प्रमोद भण्डारी, नृत्य निर्देशक राजकुमार दर्जी, निर्देशक अमर ओली, नांजाःम्ह हल ब्यवसायी दुर्गालाल प्रधान, खलपात्र गोकुल सुवेदी, हास्य कलाकार ज्याक श्रेष्ठ, पुलांम्ह निर्देशक राजु अधिकारी, पुलांम्ह सम्पादक मानबहादुर थापा, निर्माता व कलाकार कृषा चौलागाई, मोडल दीपा थापामगर, कलाकार सुन्दर श्रेष्ठ, संचारकःमि श्याम अर्याल, नृत्य निर्देशक अजय स्याङ्ताङ, निर्देशक अमर ओली व सचित खड्यायात सम्मान याःगु खः ।

ज्याझ्वलय् न्वःवासें नांजाःम्ह नोट डिजाइनर सुन्दर श्रेष्ठं छम्ह नेपाःमिया काय्या खाडी लिपा युरोपय् जुइत्यंगु पृथ्वी परिक्रमा अवार्डं सार्थकता कायेखनेमा धासें सुवेदीया सफल यात्राया भिंतुना बियादीगु खः ।

अथेहे, बरिष्ठ निर्माता बसन्तकुमार श्रेष्ठं सुवेदीं नेपाली संकिपा क्षेत्रय् निष्पक्ष व निरन्तर सभ्य व तःजिक अवार्ड ग्वसाः ग्वयाः विश्व रेकर्ड हे तःगु खँयात न्ह्यथंसें पृथ्वी परिक्रमा अवार्ड नं ऐतिहासिक जुइगु विश्वास प्वंकादिल ।

अथेहे, पुलांम्ह निर्देशक ज्ञानेन्द्र देउजां थः हरेक बक्स अफिसया ज्याझ्वलय् सहभागिता प्वंकाः वयाच्वनागु खँ कसें आः गिनिज वर्ल्ड रेकर्डय् नां च्वकाः देसया नां तइगु अवार्ड ग्वसाः ग्वःम्ह सुवेदीया पृथ्वी परिक्रमा युरोपया टुर ज्याझ्वलय् पाहाँ कथं ब्वति कायेदयाः गौरव जूगु खँ कनादिल ।

अथेहे, दोलखा ग्रुपया सुरेश पराजुली, आर्यन राउन, रविन थापा, राम थापां दोलखां वयाः थुज्वःगु भिं ज्याय् सहभागी जुइदयाः लसता पिज्वःगु खँ कनादिल ।

पृथ्वी परिक्रमा अवार्ड यात्री सुवेदीं थःगु गृहजिल्लापाखें बुद्धिजिवीपिन्सं याःगु सम्मानं अतिकं गौरवान्वित जूगु खँ कनादिल । वय्कलं थःम्हं आः जक मजूसे न्हापांनिसें हे थीथी जोखिमपूर्ण व चुनौतीं जाःगु अवार्ड ज्याझ्वः ग्वसाः ग्वयागु लुमंकूसें थुगु पृथ्वी परिक्रमा अवार्ड नं सुथां लाइगु व उकिं नेपाःया नां विश्व न्ह्यःने म्हसीकेत तःधंगु महत्वपूर्ण जुइगु खँ धयादिल । वय्कलं थःगु यात्रालिसें नेपाली संकिपा क्षेत्रय् ताःइलंनिसें योगदान यानाः वयाच्वनादीपिं व्यक्तिपिनिगु ग्वसाः खलः संस्थां सम्मान याःबलय् अझ नं गौरव महसूस जूगु खँ कनादिल ।

अवार्ड व सम्मान ग्वसाः ग्वयाः ह २० दँ दुने पृथ्वीया छगू फन्को चाःहिलेगु सुवेदीं धयादीगु दु ।

Categorized in कला