nepal life

बुन्हिया भिन्तुना म्येया कभर भर्सन छगू न्हूगु प्रयोग (भिडियो स्वयादिसँ)

नेवा: अनलाइन न्युज – विजयरत्न | २०७४ पौष १८, मंगलबार १५:५०:५९

नेपाःया संगीत ख्यलय् भिन्तुना म्ये धइगु उलि खनेमदुनि । गोल्डेन भ्वाइस अफ नेपाल प्रेमध्वज प्रधानं नेपालभाषां हालातःगु “उपहार थ्व मतिनाया छ बुदिंया भिन्तुना” छपू अज्याःगु हे म्ये खः ।

संसारय् दकलय् अप्वः हालिगु म्ये धइगु “ह्याप्पी बर्थ डे” म्ये खः धकाः धाइ । अंग्रेजी भाषाय् जक मखु न्ह्यागु हे भाषाय् नं जन्मन्हिया भिन्तुना कथं हालातःगु म्ये आपालं दु । अले आपालं हालेगु नं याः ।

नेवाःतय् दथुइ धाःसा प्रेमध्वजया म्येतकं उलि हाःगु खनेमदुनि । थुकथं संगीत ख्यलय् छगू खालि थाय् दयाच्वन । थज्याःगु खालि थाय् जायेकेगु कुतः कथं संगीतकःमि सुरजबीर बज्राचार्यया छपू न्हूगु म्ये पिहाँ वल । मंगलधुनया लसय् बुन्हिया भिन्तुना म्ये ।

मंगल धुन धायेवं हे नेपाःमिपिनिगु न्हाय्पंया निंति छगू सदां न्यनाः वयाच्वंगु धून खः । गब्लेनिसें न्यनाः वयाच्वंगु खः धइगु इतिहासया खँ जुइफु । तर झीगु निंतिं थ्व छगू चिरपरिचित धून खः । झीगु जीवनय् भ्यलय् पुनेधुंकूगु धून खः । थज्याःगु धूनया लिधंसाय् सुरजबीर बज्राचार्यं म्येग्वः चिन । अले मेम्ह संगीतकःमि जुगल डंगोलं बाजं ग्वसाः (म्युजिक एरेन्ज) ग्वलः ।

छपू न्हूगु म्ये जुया पिदन । आः वहे म्येया कभर भर्सन धेंधेंबल्ला नं जुइगु जुल । थ्व हाकनं मेगु आयाम थपे जुइगु जुल, नेवाः संगीत ख्यलय् ।

कभर भर्सन संगीतया संसारय् छगू थौंया फेशन खः, चलन खः । तर नेपालभाषाया संगीत ख्यलय् थुकथंया कुतः आःतक जूगु मदुनि । थ्वहे न्हापांखुसी खः । अले सुरजबीर बज्राचार्य थुकिया न्ह्यलुवाः कथं खनेदयेकः वल ।

संगीतयात श्रोताया धुकुती थ्यंकेत थज्याःगु कभर भर्सन थौंकन्हे छपू ताँया रुपय् न्ह्यने वयाच्वंगु दु । खस नेपाली भासाया संगीत ख्यलय् तकं कभर भर्सनं तःधंगु थाय् कायेधुंकल, तर नेवाः संगीत ख्यलय् सुनां आःतक थुखे पलाः न्ह्याकूगु मदुनि । थज्याःगु दुर्लभ पलाः न्ह्याकाः सुरजबीर बज्राचार्यं नेवाः संगीत ख्यःया थपुलिइ ग्वाहालि यात । संगीतया इतिहासय् थ्व खँ सदां स्मरणीय जुयाच्वनि धइगु खँय् धुक्क हे जूसां ज्यू ।

सुरजबीर बज्राचार्यं कनादीकथं आःतकया दुने २२ म्हेसिनं थःगु म्ये बाकायदा फेसबुक पेजय् अपलोड यायेधुंकूगु दु । थ्व कासाय् ब्वति कायेत कभर भर्सन हालिम्हेसिनं म्ये हालेधुंकाः दकले न्हापां थःगु फेसबुकय् निं अपलोड यायेमाःसा व धुंकाः उकिया लिंक Budinya Bhintuna Mye Kasa य् अपलोड यायेगु खः । थथे याना अपलोड याःपिं आःतक २२ म्ह दत । आः वइगु श्रीपञ्चमीतकया दुने म्ये दुतिने फइगु नियम कथं अझं झिंनिन्हु ल्यंदनिगु जूगुलिं थ्व ल्याः अझ अप्वइ तिनिगु व कमसेकम ५० म्ह थ्यनिगु आसा सुरजबीर बज्राचार्यं प्वंकादीगु दु ।

(थन क्लीक यानाः म्ये स्वयादिसँ)

Categorized in कला