nepal life

बुधवाः पार्टी एकताया लिपांगु रुप बिइत संयोजन समितिया बैठक

नेवा: अनलाइन न्युज | २०७४ फाल्गुण २, बुधबार ११:३२:४९

पार्टी एकतायात लिपांगु रुप बिइत थौं बुधवाः एमाले व माओवादी केन्द्रं पार्टी एकता संयोजन समितिया बैठक सःतूगु दु ।

पार्टी एकतायात क्वचायेकेगु नितिं छुं दिं न्ह्यःनिसें सहलहस पलाः न्ह्याकाच्वनादीपिं एमाले नायः केपी शर्मा ओली व माओवादी केन्द्रया नायः पुष्पकमल दाहाल प्रचण्डं सोमवाः नेतृत्व, सांगठनिक व राजनीतिक वैचारिक विषय क्वचायेकूगु खः ।

निम्ह नायः दथुइ निर्माण जूगु थ्वहे समझदारीयात औपचारिकता बिइत बुधवाः संयोजन समितिया बैठक सःतूगु जानकारी नेतातसें ब्यूगु दु ।

बैठक यलया मानभवनय् च्वनीगु जूगु दुसा ईया बारे धाःसा छुं धाःगु मदु ।

पार्टी एकता संयोजन समितिइ एमाले नायः ओली, माओवादी केन्द्रया नायः प्रचण्ड, एमाले बरिष्ठ नेता माधवकुमार नेपाल, न्वकू बामदेव गौतम, महासचिव ईश्वर पोखरेल व माओवादी केन्द्रया नेतापिं नारायणकाजी श्रेष्ठ व रामबहादुर थापा बादल दुजः दु ।

वंगु असोज १७ गते पार्टी एकतालिसें बामगठबन्धन याःगु निगू दल एमाले व माओवादी केन्द्र दथुइ लिपांगु दिनय् एकताया पक्षय् ठोस प्रगति मजुइधुंकाः थीथी कोणपाखें आशंकात ब्वलंगु खः ।

अथे ला नेतातसें वार्ता सहमति लिक्क थ्यंगु धयाः वयाच्वंगु दु । सोमवाः व मंगलवाःया सहलहलिपा एकतां मूर्त रुपं काःगु धाःगु दु ।

Categorized in राजनीति