नेवा: अनलाइन न्युज | २०७४ माघ २, मंगलबार १६:२५:४७

नेकपा एमालेया बरिष्ठ नेता झलनाथ खनालं बामपन्थीया नेतृत्वय् संविधानयात परिष्कृत यानाः यंकेगु धयादीगु दु ।

अनेरास्ववियूपाखें ग्वसाः ग्वःगु निन्हुयंकंया स्वनिगः स्तरीय प्रशिक्षण ज्याझ्वःयात मंगलवाः सम्बोधन यानादिसें भाजु खनालं ई परिस्थिति कथं संविधानयात परिष्कृत यानाः यंकेगु धयादीगु खः ।

पूर्वप्रधानमन्त्री तकं जुयादीधुंकूम्ह नेता खनालं नेपाया सीमांकन आःतक नं क्वमचाःनिगुलि दुःख प्वंकूसें धयादी, “सन्धि सम्झौतां झीगु थ्व सिमाना धाये फइ । तर अझ नं सुस्ता व कालापानीथें जाःगु आपालं थासय् सीमा विवाद दु । आः उगु सिमाना कूटनीतिक रुपं समाधान यायेमा ।”

नेता खनालं विश्वलिसेया स्वापूयात सन्तुलनय् तयेमाःगु व भारत व चीनया ग्वाहालिपाखें न्ह्यःने वनेमाःगु धारणा तयादिल । एमालेय् पुस्तान्तरणया आवश्यक जूगुलिं युवापिन्सं नेतृत्व कायेमाःगुलि नेता खनालं बः बियादिल ।

ज्याझ्वलय् पोलिटब्यूरो दुज विन्दा पाण्डें ‘मिसा आन्दोलन’ व बुद्धिजीवी खगेन्द्र प्रसाईं ‘थौंया सन्दर्भय् मार्क्सवादया आवश्यकता’ विषयस प्रशिक्षण बिइमाःगु अनेरास्ववियुया छ्याञ्जे सुदेश पराजुलीं जानकारी बियादिल ।

Categorized in राजनीति