nepal life

बंगलादेशय् स्वम्ह आतंकारी स्यात

नेवा: अनलाइन न्युज | २०७४ पौष २८, शुक्रबार १५:३८:३३

बंगलादेशया राजधानी ढाकाया छगू भवनयात घेरा तयाः सुरक्षा अधिकारीपिन्सं न्ह्याकूगु सुरक्षा कारवाहीया झ्वलय् संदिग्ध स्वम्ह मुस्लिम आतंकारी स्याःगु दु ।

सुं मुस्लिम आतंककारी सुलाच्वंगु सुचं वयेधुंकाः ढाकाया तेज्याओन क्षेत्रय् शुक्रवाः उगु सुरक्षा कारवाही न्ह्याकूगु खः ।

बंगलादेशया प्रधानमन्त्री शेख हसिनाया सरकारी निवास भवन न्ह्यनेच्वंगु रुबी भिल्ला नांया न्यागू तलाया भवनपाखें सीपिं पिकाःगु अधिकारीपिन्सं जानकारी ब्यूगु दु ।

स्याःपिं उपिं संदिग्ध आतंकारीपिनिगु म्हसीका धाःसा तत्काल सार्वजनिक मयाःगु धाःगु दु ।

वंगु दँ थुखे बंगलादेशय् इस्लामिक आतंकारीपिनिगु ल्वापु अप्वयाः वनाच्वंगु खनेदु ।

सन् २०१६ या जुलाई महिनाय् ढाकाया छगू रेष्टुरेन्टय् जूगु आतंकारकारी आक्रमणय् १७ म्ह विदेशीलिसें छगू होटय् च्वंपिं २० म्ह पाहाँपिं स्याःगु खः ।

अथेहे, उगु आक्रमणलिपा जूगु सुरक्षा कारवाहीलय् लानाः उगु हमलाय् दुथ्याःपिं कथं काःपिं थप न्याम्ह आतंकारी स्याःगु खः ।

Categorized in अन्तर्राष्ट्रिय