nepal life

बंगलादेशया पूर्वप्रधानमन्त्रीयात ज्वन, न्यादँ जेल सजाय

नेवा: अनलाइन न्युज | २०७४ माघ २५, बिहिबार १८:२०:४७

जियाया प्यम्ह ग्वाहालिमिपिन्त १० दँया जेल सजाय

बंगलादेशया पूर्वप्रधानमन्त्री खालिदा जियायात भ्रष्टाचारया मुद्दाय् न्यादँ जेल सजाय न्यंकूगु दु । अदालतया आदेश धुंकाः प्रमुख विपक्षी दलया नेतृ तकं जुयादीम्ह ७४ दँया जियायात अदालतं हे गिरफ्तार याःगु खः ।

मचातय्गु नितिं विश्वन्यंकंपाखें मुंकूगु १ करोड ६१ लख तका दां दुरुपयोगया अभियोगय् जिया दोषी ठहर जूगु खः । फैसला न्यंकूबलय् वय्कः अदालतय् हे उपस्थित दूगु खः ।

जेल वनेगु झ्वलय् मिखा जाय्कः ख्वबि तयाः जियां थःथितिपिन्त चिन्ता मयायेत व हिम्मत नष्ट मयायेत आग्रह यानादीगु खः । थःत राजनीतिपाखें प्रेरित जुयाः द्वपं ब्यूगु धासें जियां थः लिहाँ वयेगु धाःगु डेलिस्टारं जानकारी ब्यूगु दु ।

राजधानी ढाकाय् च्वंगु छगू अदालतय् फैसला न्यंकेगु झ्वलय् न्यायाधीशं धाःगु दु, “जिया विरुद्ध लाःगु द्वपं प्रमाणित जूगु दु व, जियाया सामाजिक व शारीरिक स्थितियात ध्यानय् तसें न्यादँ जेल सजाय न्यंकागु खः ।”

फैसला न्यंके न्ह्यः हे अदालत पिने जियाया द्वलंद्वः समर्थक मुंगु खः, गुकियात तितरवितर यायेत प्रहरीं अश्रुग्यास त्वःतूगु खः ।

अदालतं जियाया प्यम्ह ग्वाहालिमिपिन्त १० दँया जेल सजाय न्यंकूगु खः ।

Categorized in अन्तर्राष्ट्रिय