nepal life

फिल्म साउथ एसिया २०१७ कार्तिक १६ गते बिहिवाःनिसें

नेवा: अनलाइन न्युज | २०७४ कार्तिक १५, बुधबार १५:५७:०५

दक्षिण एसियाया प्रतिष्ठित वृत्तचित्र प्रदर्शनी मेलाया ११ क्वःगु संस्करण ‘फिल्म साउथ एसिया २०१७’ कार्तिक १६ गते बिहिवाःनिसें यलया यलमाया केन्द्रय् न्ह्याइगु जूगु दु ।

‘वृत्तचित्रः छगू साक्षी’ नाराया लिसें न्ह्यायेत्यंगु फिल्म साउथ एसिया २०१७ प्यन्हुतक न्ह्याइ । सन् २०१५ थुखे निर्माण जूगु दक्षिण एसियया समसामयिक विषयतय्के केन्द्रीत ३०० गू सिबें अप्वः वृत्तचित्रत मध्येपाखें ल्ययाः उत्कृष्ट ६३ गू वृत्तचित्रत प्रदर्शन याइगु जूगु दु ।

सन् १९९७ स न्ह्याःगु उगु द्विवार्षिक मेलां परिवर्तनकारी सोचयात प्रबर्द्धन यायेगु दक्षिण एसियाली विषयया वृत्तचित्रत वंगु २० दँनिसें प्रदशृन यानाः वयाच्वंगु खः । फिल्म साउथ एसिया २०१७ पाखें थुगु क्ष्ँेत्र व विश्वया उत्कृष्ट सकिपाःकमिपिन्त छगू हे दबुली हयाः वृत्तचित्रया विषयस सहलह यायेगु व वृत्तचित्र निर्माणयात प्रभावकारी दयेकेगु आज्जु तयाः न्ह्याकाच्वंगु खः ।

थुगु दँ प्रदर्शन जुइगु ६३ गू वृत्तचित्रमध्ये ४५ गू वृत्तचित्रतसें न्यागू सिरपाःया नितिं धेंधेंबल्ला याइ । उत्कृष्ट जुइगु वृत्तचित्रं २,००० अमेरिकी डलर राशी दूगु रामबहादुर ट्रफी कायेखनीसा ल्यू लाःगु वृत्तचित्रं १,००० अमेरिकी डलर सिरपाः कायेखनी ।

अथेहे, निर्देशकया न्हापांगु वृत्तचित्रत मध्येस उत्कृष्ट जूम्हेस्यां १,००० अमेरिकी डलरया तारेक मसूद सिरपाः, मचातय्गु विषय केन्द्रीत उत्कृष्ट वृत्तचित्रं १,००० अमेरिकी डलरया युनिसेफ सिरपाः व विद्यार्थीपिन्सं निर्माण याःगु मध्येया उत्कृष्ट वृत्तचित्रं ५,०० अमेरिकी डलर सिरपाः कायेखनी ।

बरिष्ठ पत्रकार कुन्द दीक्षित संयोजक व पाकिस्तानी संकिपाकःमि फरजाद नावी व भारतीय पत्रकार राजश्री दासगुप्ता दुजः दूगु निर्णायक समितिं उत्कृष्ट वृत्तचित्रत ल्यइगु जुइ । उगु समितिं ल्यःगु पुरस्कृत व मेमेगु प्रतिनिधि वृत्तचित्रयात २०१८ स ‘ट्राभलिङ् फिल्म साउथ एसिया’या नामं दक्षिण एसिया व विश्वया मेमेगु थासय् तकं प्रर्दशन याइगु जुइ ।

‘फिल्म साउथ एसिया २०१७’ स निगू विशेष खण्डत समावेश याःगु दु । न्हापांगु खुसि न्ह्याःगु ‘विद्यार्थी वृत्तचित्रत’स भावी संकिपाकःपिनिगु ६ गू वृत्तचित्र प्रदर्शन याइसा ‘विद्रोहया वृत्तचित्र’ खण्डय् दक्षिण एसियाली देसय् प्रतिबन्धित बाय् विद्रोहलिसे सम्बन्धित १२ गू वृत्तचित्रत प्रदर्शन याइगु जुइ ।

‘विद्रोहया वृत्तचित्र’ खण्ड दक्षिण एसियाय् खुम्चे जुजुं वंगु आलोचनात्मक सार्वजनिक वहस क्षेत्र दुनेपाखें वाक् व अभिव्यक्ति स्वतन्त्रताया सीमायात तब्या यायेगु कुतः खः ।

नांजाःम्ह भारतीय पत्रकार शशीकुमार ‘फिल्म साउथ एसिया २०१७’या मूपाहाँ जुयादी । शशीकुमार चेन्नईस च्वंगु एसियन कलेज अफ जर्नालिज्म संचालन याइगु मिडिया डेभेलपमेन्ट फाउण्डेशनया संस्थापक नायः खः । संकिपाकःमिया रुपं तकं म्हस्यूम्ह शशीकुमार भारतया न्हापांगु क्षेत्रीय स्याटेलाइट टिभी च्यानल एसिया नेटया तकं संस्थापक खः ।

‘फिल्म साउथ एसिया २०१७’ या मेला निर्देशक मितु वर्माया कथं ‘थुुगु दँ प्रदर्शनया नितिं दक्षिण एसियाय् खनेदूगु असाधारण व रोचक समसामयिक अवस्था झल्के याइगु उत्कृष्ट वृत्तचित्रत’ ल्यःगु दु ।

–प्रबिन्द्र शाक्य

Categorized in कला