nepal life

फागुपुन्हीया दिं प्यक्वःगु लुम्बिनी शान्ति म्याराथुन जुइगु

नेवा: अनलाइन न्युज | २०७४ फाल्गुण २, बुधबार १३:४३:१९

महामानव गौतमबुद्ध जन्म जूगु थाय् लुम्बिनी व उगु लागा जःखः दूगु बौद्ध सम्पदाया संरक्षण व सम्बर्द्धन यायेगु आज्जुं फागुपुन्हीया दिं प्यक्वःगु लुम्बिनी शान्ति म्याराथुन जुइगु जूगु दु ।

ग्वसाः खलः संस्था लुम्बिनी पिस म्याराथुन एड्भेन्चर स्पोर्टस नेपालं लुम्बिनी क्षेत्रयात विश्वन्यंकंया बौद्ध धर्मावलम्बीया मू तीर्थस्थलया रुपं विकास व प्रबर्द्धन यायेत उगु म्याराथुनं महत्वपूर्ण भूमिका निर्वाह याइगु जानकारी ब्यूगु दु ।

देसय् खेलकुद गतिविधिया विकास व प्रबर्द्धन यायेत तकं उगु म्याराथुनया आज्जु कथं काःगु दु ।

मायादेवीं गौतमबुद्धयात लुम्बिनीइ जन्म बिइधुंकाः कुबियाः थःगु दरबार तिलौराकोट लिहाँ वःगु लँपुयात मां मायादेवी सुत्केरी लँपुया रुपं विकास यानाः विश्व पर्यटन बजारय् प्रबर्द्धन यायेगु योजना दूगु लुम्बिनी पिस म्याराथुनया संरक्षक विक्रम पाण्डें धयादीगु दु ।

म्याराथुनया रेस डाइरेक्टर ओलम्पिक धावक बैकुण्ठ मानन्धर लुम्बिनी शान्ति म्याराथुनं लुम्बिनी क्षेत्रय् थप पर्यटक हयेत ग्वाहालि जुइगु दाबी यानादीगु दु ।

नेपाल, भारत, अष्ट्रेलिया, चीन लगायतया देसपाखें थ्यंमथ्यं २५० म्ह धावकं लुम्बिनी शान्ति म्याराथुनय् ब्वति काइगु जानकारी पाण्डें जानकारी बियादीगु दु । ४२ किलोमिटर ताःहाकःगु फुल म्याराथुन, २१ किलोमिटर ताःहाकःगु हाफ म्याराथुन व ५ किलोमिटर ताःहाकःगु दौड यानाः स्वंगू विधाय् म्याराथुन याकीगु जूगु दु ।

फुल म्याराथुनय् न्हाप जूम्हेसित १ लखया लुम्बिनी अशोक सिरपाः, ल्यू लाःम्हेसित ७५ हजारया कपिलवस्तु हुएन सान सिरपाः व लियांल्यू लाःम्हेसित ५० हजारया मायादेवी गार्डेन उथान्त सिरपाःया लिसें पदक दसिपौ लःल्हाइगु ग्वसाः ग्वयातःगु दु ।

अथेहे, हाफ म्याराथुनय् न्हाप जूम्हेसित ५० हजार, ल्यू लाःम्हेसित ३५ हजार व लियांल्यू लाःम्हेसित २५ हजार तका सिरपाः बिइगु ग्वसाः ग्वयातःगु दु ।

Categorized in कासा