nepal life

प्रधानमन्त्री दैवी प्रकोप उद्दार कोषय् १ करोड २ लखं मल्याक ग्वाहालि

नेवा: अनलाइन न्युज | २०७४ भाद्र २८, बुधबार १५:२२:०९

दक्षिण कोरियालीया कोरिया साउथ–इष्ट पावर कम्पनीं प्रधानमन्त्री दैवी प्रकोपा उद्दार कोषय् १ करोड २ लख ५७ हजार ८७१ तका दां ग्वाहालि याःगु दु ।

उपप्रधान व परराष्ट्रमन्त्री कृष्णबहादुर महरायात बुधवाः परराष्ट्र मन्त्रालयस नापलाना कम्पनीया नायः व प्रमुख कार्यकारी अधिकृत च्याङ जाई वनं उगु रकम लःल्हानादीगु खः ।

उगु रकम उपप्रधानमन्त्री महरां प्रधानमन्त्री ज्याकुथया छ्याञ्जे शंकरप्रसाद अधिकारीयात लःल्हानादीगु खः ।

उपप्रधानमन्त्री महरां कोरिया साउथ–इष्ट पावर कम्पनीं खुसिबाः पीडितया नितिं ग्वाहालि याःगुलिं सुभाय् प्वंकादिल । वय्कलं कम्पनीं न्ह्याकूगु माथिल्लो त्रिशुली–१ जलविद्युत आयोजनाया विषयस जानकारी कयादीगु खः ।

उगु ज्याझ्वलय् कम्पनीया प्रमुख कार्यकारी अधिकृत च्याङं माथिल्लो त्रिशुली–१ परियोजना भुखाचं यानाः छुं समस्या जूसां नं द्रुत गतिइ न्ह्यःने यंकागु जानकारी बियादिल । वय्कलं विद्युत खरिद सम्झौता पीपीए यात न्ह्यःने यंकेत इनाप तकं यानादीगु खः ।

लिसलय् उपप्रधानमन्त्री महरां विद्युत खरिद सम्झौताया विषयस थःम्हं सम्बन्धित निकायलिसे खँ ल्हायेगु धयादीगु दु ।

Categorized in राष्ट्रिय