nepal life

प्रदेश व केन्द्रीय सभा चुनावय् सु न्ह्यःने लाइ ? गुप्तचर रिपोर्ट वल

नेवा: अनलाइन न्युज | २०७४ कार्तिक ८, बुधबार १४:०१:११

वाम व लोकतान्त्रिक मोर्चा दयेकाः चुनाव ल्वाइबलय् गुगु दलं गुलि मत काइ, सुयागु प्रत्यक्षपाखे गुगु हैसियत जुइ ? छु वधुंकाः नेपाली कांग्रेसया नेतातसें धाःकथं हे वाम अधिनायकत्व पलिस्था यायेफइगु कथं देय् न्यंकं ‘लाल झण्डा’ ब्वयेकीगु सम्भावना दुला ? कि थुगु फुक्क खँत ‘भ्वँया धुँ’ जक खः, जंगलया धुँ जुइगु हैसियत विनाया । यावत् न्ह्यसःया लिसः मालाच्वंम्ह प्रधानमन्त्री शेरबहादुर देउवायात आः नकतिनि जासुसी संयन्त्रं छगू विश्लेषणात्मक रिपोर्ट लःल्हाःगु दु ।

उकी वइगु निर्वाचनय् वाम गठबन्धन गुगु स्थितिइ लाइ, नेपाली कांग्रेसं प्रत्यक्ष व समानुपातिकय् गुलि सिट व प्रतिशत हयेफइ, एमाले व माओवादीं गुलि गुलि मत व थाय् थःगु पक्षय् लाकीगु सम्भावना दु धैगु निसें कयाः संघीय समाजवादी फोरम नेपाल, राजपा, राप्रपा, नयाँ शक्ति नेपाल व मेमेगु दलतसें काये फइगु प्रत्यक्षपाखेया सिट ल्याः व समानुपातिकपाखें हयेफइगु प्रतिनिधित्वया तकं आँकलन यानातःगु दु ।

स्थानीय तह निर्वाचन २०७४ य् पार्टीतसें काःगु मत ल्याः व उकिया सम्भावित बाँडफाँड तकंया आधारय् दलतय्गु भविष्य बारे याःगु आँकलनं नेपाली कांग्रेस निगूगु थासय् लाइगु क्यनातःगु दु ।

गठबन्धनय् सामेल याकेत कांग्रेसं राजपाया दबाब सह यायेमाली धासें बाम गठबन्धन व लोकतान्त्रिक गठबन्धनया विश्लेषण यायेत विगतया निर्वाचनतय्के वःगु मतयात तकं आधार दयेकूगु दु ।

नेपाली कांग्रेसं २०७० सालया संविधानसभा निर्वाचनय् प्रत्यक्षपाखे २६ प्रतिशत विजय हासिल याःगु दुसा समानुपातिकपाखे २९.८ प्रतिशत मत काःगु खः ।

२०७४ या स्थानीय तह निर्वाचनय् वं मुक्कं ३३ प्रतिशत मत हासिल याःगु खनेदु जबकि एमालें ३४ प्रतिशत मत ल्हातय् लाकूगु खः ।

प्रत्यक्ष पाखे २०७० सालय् मुक्कं २४ प्रतिशत व समानुपातिक पाखे मुक्कं २८ प्रतिशत मत प्राप्त यानाः निगूगु थासय् लाःम्ह एमाले आः न्हापांगु थासय् लाइगु आधार हे २०७४ या स्थानीय तह निर्वाचनय् वं प्राप्त याःगु मत प्रतिशत खः । माओवादी केन्द्र २०७० साल सिबें अप्वः क्वाहाँ मवंगु तथ्यांकं क्यनातःगु दु ।

(थौं ने.सं. ११३८ कार्तिक ८ गते बुधवाः जनआस्था वाःपतिइ पिदंगु बुखँ)

Categorized in पत्रपत्रिका