प्रदेश राजधानी सवालय् झीगु सरोकार ( बिचाःच्वसू )
नेवा: अनलाइन न्युज – निश्चल | २०७४ पौष २३, आइतबार १२:११:०६
सानुराजा शाक्य
थौकन्हे प्रदेशया राजधानी जिमिथाय् तयेमाः धकाः थी थी जिल्लाय् छगू कथंया आन्दोलन जुयाच्वंगु दु । प्रदेशया चुनाव क्वचाया प्रदेशसभा व प्रादेशीक सभा दयेके लिबाये धुंकल तर सरकारं यायेमाःगु प्रदेश प्रमुखया घोषणा व प्रदेशसभां प्रदेशया केन्द्र (राजधानी) गन दयेकेगु धकाः क्वमछिउतले यायेमाःगु अस्थायी मुकाम तकं घोषणा याये मफयाच्वंगु दु । प्रदेशया अस्थायी मुकाम घोषणा यायेगु ज्या सरकारया ढिलासुस्ति अप्वःया वःलिसें थःथःगु थासय् प्रदेशया मुकाम दयेकेमाः धकाः जिल्ला जिल्लाय् प्रदर्शन, हडतालत जुयाच्वंगु दु । सरकारया हे छगू निकाय नं भौतिक सुविधा व वये वने अपुइगु थाय् धकाः न्हय्गु प्रदेशया अस्थायी राजधानीया रुपय् एक नम्बरया नितिं विराटनगर, दुईया जनकपुर, तीनया थिमी÷ख्वपः, चारया पोखरा, पाँचया दाङ्ग, छया सुर्खेत व सातया धनगढी सिफारिश जुल धकाः चर्चाय् वल । थुकथंया बुखँ पिने वयेवं थःगु थासय् प्रदेशया मुकाम तयेमाः धकाः धयाच्वंपिसं थःपिनिगु जिल्ला प्रदेशया अस्थायी मुकाम तकं मजुइवं आन्दोलन यानाहःगु खः । थ्वया दथुइ न्यनेदु कथं सरकारं अस्थायी मुकाम तकं क्वमछिसे न्हय्गु प्रदेशया हे प्रमुख घोषणा यानाः न्हय्गु प्रदेशया निर्वाचित सभासद्तय्त येँय् हे सपथ ग्रहण याकाः प्रदेशया प्रदेश प्रमुखं प्रदेशसभाया न्हापांगु मुंज्या च्वनेगु थाय् जक तोके यायेगु तर अस्थायी केन्द्र धकाः तकं घोषणा मयायेगु रणनीति सरकारं ज्वनेत्यंगु खनेदु । गुकिं यानाः राजधानीयमा माग यानाच्वंपिनिगु मिखाय् सरकारं अपजस फये माली मखु व प्रदेशसभाय् हे राजधानी घोषणा यायेगुली हानथाप जुयाः प्रादेशीक सरकार तकं याकनं गठन याये मफइगु अवस्थाया सिर्जना यानाः सरकार स्केप जुइत्यंगु खनेदु ।
स्वनिगः देय्या केन्द्र जुयाः झीगु अस्तित्व, भाषा व पहिचानय् सगं बायावःगु खः धइगु नेवाः मुभमेन्टया मान्यता खः । सायद थ्व दृष्टिकोण गलत नं जुइफु धइगु खँय् अध्ययन मजू । तीन नम्बर प्रदेशया केन्द्र ख्वपया थिमि जुल धकाः झी खुसी जुइगु कि दुखी जुइगु धइगु खँय् नं अलमल खनेदु ।
प्रदेशया राजधानीया सन्दर्भ वइबलय् झीनाप स्वानाच्वंगु तीन प्रदेशया अस्थायी वा स्थायी केन्द्र गन जुइ धइगु सवालनाप झीगु नं सरोकार दु । तर स्वनिगःया जनतायात तीन नं. प्रदेशया केन्द्र स्वनिगः दुने मखु पिने जूसां स्वीकार खःला धइगु थुइगु कथं मौन च्वनाच्वंगु खनेदु । संघीयता कन्हे पूर्ण रुपं कार्यान्वयनय् वनीबलय् स्वनिगःया जनता गनं यक्व ल्याखय् नेवाःत नं दु उपिंनाप सरोकार दइगु थाय् धइगु तीन नं. प्रदेशया केन्द्र हे जुइ । भाषा जातिया खँ ल्हाइपिनिगु नितिं जक मखु उद्योग व्यापार व्यवसाय याइपिं नेवाः लगायत स्वनिगःया वासिन्दानाप नं तीन नं. प्रदेशया केन्द्र चर्चाय् वःकथं ख्वपया थिमि लाइबलय् गुलि सहज व फाइदा जुइ मकवानपुर वा चितवन जुइबलय् जुइला ? छकः बिचाः यायेमाः । नेवाः मुमभेन्टया छथ्वसिनं येँया राजधानी हे पिने यंकूसां जिउ धकाः धयाच्वंगु अवस्थाय् तीन प्रदेशया केन्द्र नं स्वनिगलं पिने यंकी धइगु आसयया अभिव्यक्ति पिथनाच्वंगु दु । तर थुकथंया आसय आम नेवाः व स्वनिगःया वासिन्दातय् आसय मजुइफु धइगुलि नं ध्यान बिइमाः । आम नेवाःत छथाय् तर नेवाः मुभमेन्ट मेगु दिशाय् लानाच्वंगुलिं म्हिगःया इलय् नेवाः मुभमेन्टं पिकअप काये मपूmगु खः । स्वनिगः देय्या केन्द्र जुयाः झीगु अस्तित्व, भाषा व पहिचानय् सगं बायावःगु खः धइगु नेवाः मुभमेन्टया मान्यता खः । सायद थ्व दृष्टिकोण गलत नं जुइफु धइगु खँय् अध्ययन मजू । तीन नम्बर प्रदेशया केन्द्र ख्वपया थिमि जुल धकाः झी खुसी जुइगु कि दुखी जुइगु धइगु खँय् नं अलमल खनेदु । जित स्वयेबलय् भाषा जातिया अधिकारया सवालय् जक मखुकि कन्हय् आम नेवाः व स्वनिगःया जनताया सरोकारयात प्रादेशीक सरकारं वेवास्ता यात धाःसा दवाव बिइत तीन नम्बर प्रदेशया केन्द्र थिमि जुइबलय् गुली अःपुइ कन्हे स्वनिगलं पिने वन धाःसा झीसँ थःगु सः तकं थने मफइगु खँयात नं ध्यान बिइमाः ।
तीन नम्बर प्रदेशया केन्द्र ख्वपया थिमि जुल धाःसा झीसँ लसकुस हे यायेमाः न कि विरोध
गन तक तीन नम्बर प्रदेशया केन्द्र थिमि तइबलय् अनया कृषि भूमित सखाप जुइ धकाः धाइपिं झी नेवाःत सायद येँ नं थिमि तक हे मथ्यं धइगु वास्तविकता क्यनाच्वनी छाय्कि थिमिया बोडे, नगदेश लागाय् न्हापा थें याःगु बुँ मदयेधुंकल अनया यक्व धइथें भूभाग सरकारी व नीजि निकाय नं प्लटिङ्ग यानाः विकसित घडेरीया रुपय् विकास यानातयेधुंकल । अनया किसानतसें नं बुँ ज्या यानाः नयेगु स्वयां व हे बुँइ छेँ सयेका नये सःगु वास्तविकता यात नं ध्यान तयाः तीन नम्बर प्रदेशया केन्द्र ख्वपया थिमि जुल धाःसा झीसँ लसकुस हे यायेमाः न कि विरोध ।
Categorized in बिचा: