nepal life

प्यंगू पेस्तोललिसें तनहुँइ स्वम्ह ज्वन

नेवा: अनलाइन न्युज | २०७४ मङ्सिर १८, सोमबार १३:५४:२३

तनहुँया आबुखैरेनीपाखें प्यंगू पेस्तोल व गोलीलिसें स्थानीय स्वम्ह मनूयात ज्वंगु दु । विशेष सुचंया आधारय् सोमवाः सुथय् इमित ज्वंगु खः ।

ज्वंपिं आबुखैरेनी गाउँपालिका–३ या २८ दँया अभियान श्रेष्ठ, आबुखैरेनी गाउँपालिका–४ या २४ दँया विजय गुरुङ व वहे थाय्या २६ दँया जय गुरुङ खः ।

इलाका प्रहरी ज्याकुथि आबुखैरेनीयात वःगु विशेष सुचंया आधारय् प्रमुख प्रहरी निरीक्षक लोकबहादुर गुरुङ नेतृत्वया पुचः व कृष्णदल गण ढकालटारपाखें प्रमुख सेनानी अशोककुमार कार्की नेतृत्वया मंकाः पुचलं चान्हय् १२ ता ईनिसें मद्दिक्क निगरानी इमित तयाः सोमवाः सुथय् ज्वंगु जानकारी ब्यूगु दु ।

इमिगु पाखें प्रहरीं अमेरिकाय् निर्मित ६ राउण्ड गोली लोड दूगु स्वंगू थान पेस्तोल, स्वंगू थान एक्स्ट्रा म्याग्जिन, ३९ थान एक्स्ट्रा गोली, गोली मदुगु खाली अवस्थाया इटालियन पेस्तोल छगू थान, म्यागनम ल्वाभतय् तयेगु गोली ४८ थान, खेलौना पेस्तोल छगू थान व चक्कु छगू थान बरामद याःगु खः ।

आबुखैरेनी गाउँपालिका वडा ल्याः ३ स च्वंगु अभियान श्रेष्ठया छेँय् इमित ज्वनेगु तयारी जूगु इलय् प्रहरीलिसे भिडन्त यायेगु तयार अवस्थाय् दूगु सीके धुंकाः थप सुरक्षा बलया नितिं सशस्त्र प्रहरी निरीक्षक चन्द्रकुमार थापा नेतृत्वया पुचः अन थ्यंकूगु खः ।

ज्वंपिं सकलसित थप अनुसन्धानया नितिं इलाका प्रहरी ज्याकुथि आबुखैरेनीया हिरासतय् तयातःगु प्रहरीं जानकारी ब्यूगु दु ।

Categorized in दुर्घटना-अपराध