nepal life

पोखराय् फिल्म फेस्टिभल २०१८ क्वचाल

नेवा: अनलाइन न्युज – विजयरत्न | २०७४ माघ २४, बुधबार १५:५१:३७

नेपाल फिल्म एण्ड कल्चरल एकेदेमिया ग्वसालय् पोखराय् प्यन्हुयंकं जूगु ‘नेपाल इन्टरनेशनल फिल्म फेस्टिभल २०१८’ तःजिक क्वचाःगु दु ।

फेब्रुअरी २ तारिखनिसें ५ तारिखतक न्ह्याःगु उगु फेस्टिभलय् कजाकिस्तानया ‘रिटर्नी’ नांया फिल्मं अन्तर्राष्ट्रिय धेंधेंबल्लापाखेंया बेस्ट इन्टरनेशनल फिल्म कथं गौतमबुद्ध अवार्ड त्याकेत ताःलाःगु खः ।

अथेहे, शर्टफिल्मपाखे नेपाःया ‘जाल गेडी’ फिल्मं बेस्ट इन्टरनेशनल शर्टफिल्म कथं माउण्ट एभरेष्ट अवार्ड त्याकेत ताःलाःगु खः ।

थुगु सिरपाः दुने न्यासः डलर व फिचर फिल्मयात द्वःछि डलर सिरपाः कथं लःल्हाःगु खः ।

अथेहे, जर्जियाया ‘किप स्माइल’ फिल्मयात जुरी अवार्ड लःल्हाःगु खः ।

थ्वहे झ्वलय् नेपाल पानोरामापाखे न्यय्द्वः (५० हजार) तकाया बेस्ट फिचर फिल्म कथं फेवा अवार्ड ‘देश खोज्दै जाँदा’यात ब्यूगु खःसा शर्टफिल्मपाखे नीन्याद्व (२५ हजार) तकाया अन्नपूर्ण अवार्ड ‘अनन्त यात्रा’यात ब्यूगु खः ।

अथेहे, नेपाल पानोरामापाखे ‘म भोलि जन्मनेछु’यात जुरी अवार्ड लःल्हाःगु खः ।

ग्वसाः खलः नेपाल फिल्म एण्ड कल्चरल एकेदेमिया नायः केपी पाठकया सभानायःसुइ पोखराया उद्योग वाणिज्य संघया सभाकक्षय् जूगु समापन ज्याझ्वलय् सांसद रविन्द्र अधिकारी मूपाहाँ कथं झायादीगु खः ।

ज्याझ्वलय् नेपाल इन्टरनेशनल फिल्म फेस्टिभल २०१८ पोखराया सह संयोजक कवि तिर्थ श्रेष्ठं लसकुस यानादीगु खःसा उगु फेस्टिभलया फेस्टिभल डाइरेक्टर मनोज पण्डितं सुभाय् देछानादीगु खः ।

Categorized in कला