nepal life

पोखराय् अप्वः भाडा असुल याइपिं ट्याक्सी चालकया आन्दोलन

नेवा: अनलाइन न्युज | २०७४ पौष २६, बुधबार १६:४३:४५

“सिभिल वसतय् वयाः ट्याक्सी चालकयात अप्वः भाडा काःगु धासें ज्वनाः आतंकित यायेगु ज्या यात प्रहरीं । भाडा समायोजन मयाःसे जिमिसं मिटरय् ट्याक्सी चलेयाये फइमखु ।”

थः यत्थे भाडा असुल यानाच्वंगु अवस्थाय् ट्याक्सी चालकयात रंगेहात प्रहरीं गिरफ्तार याःगु विरोधय् आन्दोलनय् क्वाहाँ वःपिं पोखराया ट्याक्सी चालकया आन्दोलनय् प्रहरीं हस्तक्षेप याःगु दु ।

पोखराया मू चोकय् ट्याक्सी पार्किङ यानाः सतक जाम याःगु ट्याक्सीयात प्रहरीं घ्वानाः सतकया सिथय् यंकाः यातायात सुचारु रुपं संचालनय् हःगु खः ।

पोखराया पृथ्वीचोक, चिप्लेढुंगा, सभागृह चोक लिसेंया मू चोकय् ट्याक्सी पार्किङ यानाः ट्याक्सी चालकपिं आन्दोलनय् क्वाहाँ वःगु खः ।

प्रहरीं आन्दोलनरत् चालकपिन्त तितरबितर यासें तःधंगु ल्याखय् थ्यंकूपिं प्रहरीं लँपुइ हे पार्किङ याःगु ट्याक्सी घ्वानाः लँपु चायेकूगु खःसा हाकनं सुं सुं ट्याक्सी चालकयात प्रहरीं नियन्त्रणय् काःगु खः ।

मू चोकय् प्रहरीं ट्याक्सी घ्वाना यंकीगु व सालाः दथु सतकं ट्याक्सी चीकूगु लू मनूतसें न्ह्याइपुक्क स्वःगु खः । कास्की प्रहरी प्रमुख एसपी अशोक सिंहया हे कमाण्डय् प्रहरी पुचः थ्यंकेधुंकाः आन्दोलनकारी ट्याक्सी चालकपिं भागाभाग जूगु खः ।

मंगलवाः सिभिल वसतं प्रहरीं ट्याक्सी गयाःः अप्वः भाडा असुल याःपिं ट्याक्सी चालकयात गिरफ्तार याःगु खः । उकिया विरोधय् ट्याक्सी व्यवसायी समिति पोखराया नेतृत्वय् व्यवसायी व चालकपिं ट्याक्सी चलेयायेगुलि बन्द यानाः आन्दोलनय् क्वाहाँ वःगु खः ।

प्रहरीं सिभिल वसतय् वयाः ट्याक्सी चालकयात अप्वः भाडा असुल याःगु धासें ज्वनेधुंकाः पोखराया मू चोकय् ट्याक्सीत लाइन तयाः चालकं आन्दोलन याःगु खः ।

ट्याक्सी व्यवसायी समिति पोखराया छ्याञ्जे तुलसी दाहालं धयादी, “सिभिल वसतय् वयाः ट्याक्सी चालकयात अप्वः भाडा काःगु धासें ज्वनाः आतंकित यायेगु ज्या यात प्रहरीं । भाडा समायोजन मयाःसे जिमिसं मिटरय् ट्याक्सी चलेयाये फइमखु ।”

Categorized in राजनीति