nepal life

पोखराय् अन्तर्राष्ट्रिय फिल्म फेस्टिभल जुइगु

नेवा: अनलाइन न्युज – ललेन्द्र शाक्य | २०७४ पौष १७, सोमबार १७:१६:५९

नेपाल चलचित्र व सांस्कृतिक प्रतिष्ठानया ग्वसालय् वइगु माघ १९ गतेनिसें २२ गतेतक प्यन्हुयंकं पोखराय् छगू तःजिगु अन्तर्राष्ट्रिय फिल्म फेस्टिभल जुइगु जूगु दु ।

ग्वसाः खलकं थ्व फेस्टिभलया विषयस जानकारी बिइत सोमवाः छगू प्रेस सम्मेलन याःगु दु ।

ग्वसाः खलःया कजि केपी पाठकं जानकारी ब्यूकथं उगु फिल्म फेस्टिभलय् नेपाःया नापनापं थीथी देय् पाखें मुक्कं ४०० गू संकिपा दुहाँ वःगु खःसा उकीमध्ये मुक्कं ५३ गू संकिपा क्यनीगु जूगु दु ।

नेपाल इन्टरनेशनल फिल्म फेस्टिभल (नीफ) २०१७ कथं हनीगु उगु फिल्म फेस्टिभलय् नेपाःपाखें १६ गू फिल्मया नापनापं अमेरिका, इराक, बंगलादेश, भारत, अफगानिस्तान, ब्राजिल, इजिप्ट, सिंगापुर लिसेंया आपालं देशया फिल्मं ब्वति कायग्ु जूगु दुसा फेस्टिभलय् नेपाली पानोरामा व अन्तर्राष्ट्रिय धेंधेंबल्ला यानाः निगू बिस्कं धेंधेंबल्ला जुइगु खँ फेस्टिभल डाइरेक्टर मनोज पण्डितं कनादीगु खः ।

उगु फिल्म फेस्टिभलय् दुथ्याइगु फिल्म छनौटया नितिं तीर्थ श्रेष्ठ, करुण थापा, विजयरत्न तुलाधर असंबरे, सचिन घिमिरे व मनोज पण्डित ल्यज्या कमितिइ च्वनादीगु खः ।

उगु फेस्टिभलय् दुथ्याःगु फिल्म मध्ये बेष्ट फिल्म फिचर, बेष्ट शर्ट फिल्म लिसें नेपाली पानोरामाय् बेष्ट फिल्म व बेष्ट शर्ट फिल्मया नापनापं निगू जुरी अवार्ड नं दइगु खँ प्रेस मिटय् जानकारी ब्यूगु खः ।

सिरपाः क्वछिनाया नितिं चीनया पेङ सियाओलियन, जापानया सोजो इचियामा, श्रीलंकाया भिमुक्थी जयासुन्दरा, कतारया खलिल बेनिकर्ने, भारतया अशोक राने, नेपाःया मीनबहादुर भामपिं निर्णायक कथं च्वनीगु खँ सोमवाः जूगु प्रेस सम्मेलनय् जानकारी ब्यूगु खः ।

Categorized in कला